Tura, Oct 7: Rajabala bye-election-o susaenggipa saksakamkam me•chik candidate aro Congress dolni Hashina Yasmin Mondol, Bristibar salo Tura DC office-ona re•ange Returning Officer-ni mikkango an•tangni susaani lekkarangko on•eaha.
Mondol-ni nomination file ka•ani somoio Congress dolni dilgiparangba dongpaaha indiba Congress dolni ja•delbatsranggipa aro a•dokni gitcham chief minister Mukul Sangma-de dongpaskajaha.
Iana skang, NPP-ni candidate Abdus Saleh-ba Rajabala bye-election-o susana gita an•tangni lekkarangko on•manahachim aro uandaken da•o ia constituency-ni bye-election-o susana nomination file ka•giparang sakgni gapengaha.
NPP-ni candidate Abdus Saleh-ara Mahendraganj-ni gitcham MLA ong•achim aro ua da•o Rajabala constituency-o gittamgipa changna susaengachim.
Indake ong•engon, ia Rajabala bye-election-o susana gita Congress dolni tikitko man•rikjae United Democratic Party (UDP)-o napanggipa GHADC-ni MDC Ashahel D Shira-ba Sukrobar salo, an•tangni lekkarangko on•enaba gnang.
