Shillong, Oct 07: Niamchi champengatako man·gipa Hynniewtrep National Liberation Council (HNLC) bobil doloni saksa East Jaintia Hills district-ni Deputy Commissioner-ni mikkango an·tangko bame on·angaha ine a·dokni home minister Pa Lahkmen Rymbui Brisitbar salo u·iataha.

Minister-ni aganani gitade, bobil dolni sipai Emanuel Suchen batanggimin 2002 bilsio champengata man·gipa dolo napangahachim, indake uko 2008 bilsio rim·e pattokoba donatahachim indiba apsan dolchin ua ja·mano napangpiltaiaha.

“Namgipa gisik uno dongengkua, indake ua da·alo an·tangko niamni mikkango bame on·na gita re·baaha, uni gimin chinga namen kusi ong·a aro apsandaken police department-ba ine Pa Rymbui aganaha.

Iani bidingo uko a·bachenge sing·sandianiko dakatanio, batanggimin somoio star cement aroba Khliehriat police reserve-ko gopretatanio Suchen-ni jakba dongachim ine ma·sina man·aha ine u·iatan baksa, police uko sing·sandianiko dakangkuenga aro somoi sokon ua bang·akon agane on·angkugen ineba home minister agandapataha.