Tura September 23: Raksamgre-o FOCUS programme-na tom·bimonganio game ge·e cha·gipa dolrangoni sak hajal 3-na bate tom·baaha. Tom·anio a·dokni skotong Minister Pa Conrad K Sangma, Williamnagar-ni MLA Pa Marcuise Marak, Pa Jimmy Sangma aro Pa Limison Sangma-ba dongpaaaha.
Tom·anio dingtang dingtang SHG, game ge·e cha·gipa dolrang, chadambe dolrang sorkarini dakchakna on·enggipa tangka paisarangko ra·chakangaha.
FOCUS gita gamgipa dolrangna tangka gong lakh 33.90 tangkarangko on·angan baksa FOCUS+ gita sakprakprakna on·enggipa tangkarangkoba on·angaha. Chadambe dol 21-naba YESS Meghalaya program nigita tangka gong lakh 9-ko on·angaha.
A·doko songdongenggipa manderangni nikjumangniko chu·sokatna aro ka·dingsmitgipa mikkangko NPP dolchi rikenggipa MDA sorkari chu·sokatna man·aha ine antangni suk onganiko Skotong Minister ia tomanio parakataha.
