Shillong, June 2: Shillong songjinmao aro mongsongbate Khyndailad aro Motphran jolrango local taxi aro gipin para salgiparang bang•dugaahani a•sel ramarang apchangket ong•engani giminsa para salgipa garirangko da•o ‘odd-even’ nombor dake salate nichengenga indiba iandake ‘odd-even’ nomboro para salgipa garirangko salatanio apchangket ong•anirang olgrokgenchimode mikkangchi ia niamko ja•rikangkamgen ine Sukrobar salo, East Khasi Hills a•jani Deputy Commissioner Rosette M Kurbah parakataha.
Kashari Point-oni Police Bazar (Khyndailad) aro Motphran-ona para salenggipa SPTS bus garirang, SSPTS maxi cab-rang aro local taxi-rangko odd-even nomboro pangchake salchina gita Bristibar salon, East Khasi Hills a•jani DC ge•etaniko on•angahachim ine nikna man•a.
Indake ong•genchimoba, iandake odd-even nomboro pangchake para salataniko Taxi Welfare Association aro Shillong-ni gipin Taxi dolrang jegalatskaenba, ia ge•etaniko jegale kachariona re•angna ka•mikkenatskaaha.
