Williamnagar, June 28: Mongolbar walo, Jengal-oni Williamnagar-ona dakanggipa ramao donggipa East Garo Hills a•jani Rangmalgre songo, mande saksani me•chik saksako so•otna jotton ka•engmiting somoio songni manderang re•angchangenba, ia me•chikko jokatna gita man•aha.

Koborko on•ani gitade, Mongolbar attamni 6:30 bajimango, ramasamo me•chik saksani chrikako knae, songni manderang ramao dongsoenggipa gariona rikangon, ia gario me•asa saksani me•chik saksako cello tape-rangchi kae uko so•otna jotton ka•engmitingko nikeaha. Songni manderang, ia me•asako rim•e, maini gimin me•chikko iandake ka•saninggija dakenga ine sing•sandion, uamang bilsibrimangna ka•sagrikani ja•man ia me•chik uko cha•bokaha ine me•asa aganchakaha. Iani ja•mano songni manderang, me•chikko garioniko ra•ongkaton, dos dakgipa mande, an•tangni garion ua biaponi sale kataha ine kobor on•aha.

Iani a•selni bidingo, me•chikni nokdang, police-rangna FIR ka•doangaha aro FIR-o parakani gitade, ia me•chik, dos dakgipa Sonal Ch Marak-ko 2017 bilsionin ma•sie uamang gisepo 2021 bilsiona kingking mikchagrikahachim.

2021 bilsio watgrikani ja•man, ia me•chik da•o Tura-ni Sampalgre jolo nok para ra•e dongengachim indiba ia a•sel ong•ani salo dosko dakgipa Sonal Marak, salni 1:00 bajimango uni nokona re•ange, me•chikko Bansamgre rona ine rimeaha. Uandaken uamang sakgni, me•asani ra•anggipa Renault Triber gario, Samanda-ona re•angaha indiba Samanda-oni re•bapilengmiting somoio uamang Rangmalgre jolo neng•takaha. Attamni 6:30 baji ong•ahaon ia me•chik, me•asako nokona sale donchina aganahachim indiba ua me•chikni aganako knachakjahani gimin ia me•chik, an•tangni ma•a paana phone ka•atna jotton ka•on ua uni mobile phone-ko ra•sekaha. Uni mobile phone-ko ra•sekani gimin ia me•chik, garioni ong•one katna jotton ka•on, ua uko uni skoo su•ataha aro ja•mano uni ja•a jakrangko cellotape-chi kaenba, uni ku•sikkoba cellotape-chi tape donaha.

Indake ong•genchimoba, ia me•chik maibakae, an•tangni ku•sikoniko cellotape-ko akchrake galna man•enba dakchakchina chrikon, ia me•asa uni gitokkoba cellotape-chi kae so•otna jotton ka•ahachim. Uni iandake chrikako knae ja•mano songni sakbri manderang uko dakchakna re•baaha indiba dos dakgipa mande, ua biaponi gari sale katna man•skaahachim.

Indake ong•engon, dos dakgipa mandeko da•o police-rang rim•na man•aha aro iani bidingo Williamnagar Women Police Station-o case-ko segataha ine police-rang parakatenba, ia a•sel ong•gipa video-ko watjojoe rojachinaha gita manderangko didiataha.

Iakoba poraie nina man·gen: Ma Ampareen, WKH-ni sanram biaprango mande chu·ongjaenganiko skotong ministerna u·iatangnasia

Watch

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub