Tura, June 29: Sonja Wildlife Rescue Centre-o donenggipa Huro-rangko Hoolock Gibbon-ona Sorkarini jitatskaenganiko, Garo Hills-ni dingtang dingtang dolrang jegalataha.
Tura-oni 35 km mang chel•ao donggipa Chinabatni Silsotchigre songo, Sonja Wildlife Rescue Centre-ko Huro-rangko naljokate nirokaniko dakna miksonge, France a•songni mande Florian Magne minggipa 2009 bilsio a•bachengataha aro ia bilsioni mang 16 Huro-rangko ia centre-o jokataha. Aro da•alo ia Sonja Wildlife Rescue Centre-o Saliram jolni mang 10 Huro-rangko jokate nirokaniko dakenga, jekon, mikkangchi buringona watatpilna mangsongengaha.
“Meghalaya a•dokni forest department bangbanggipa zoo ba matburungrangko donchakram biapo matburungrangko gapatna nangengani giminsa, ia naljokatgimin Huro-rangko Umtrew-o mesokna ra•angskaenga aro ian Lucknow Zoo aro Guwahati Zoo baksa bodolsreanio uamangko jakkala gita ong•a, jean bilongen namjabeani ong•a” ine HURO Programme-ko bikotchenggipa aro Director, Florian Magne, Hub News-ni kobor ra•timgiparangna aganaha.
“Ia Huro-rangko jitatenganiko chinga raken jegalatenga, maina, ian National aro International Wildlife Laws-ni kosako re•badeani gita ong•enga aro ian Huro ma•malko naljokate ripingani project-ko bon•atenganiba ong•enga” ineba ua agandapataha.
Batanggimin somoirango ba mang 3 Huro-rangko buringona watatpilaha, jeonikon, 2019 bilsio bon•kame Huro bipa mangsako watatahachim aro uni gipin bilsio Huro bi•sani atchianikoba nikna man•aha ineba ua janapataha.
Conservation Initiatives-ni Senior Scientist, Dr. Divya Vasudev, jean, Meghalaya a•doko donggipa Huro-rangni gimin sandirikitaniko dakahachim, ua, Huro rangko jilna gitasan buringoniko jokatrongenga aro ian Schedule-I ni ning•o on•gimin niamrangni gimin aro niamrangko pe•genchimode mai ong•genchim, uarangni gimin u•ijani a•selsa ong•enga. Uni gimin, ia Huro-rangko jokatataniara nangchongmotgipa ong•enga. Iarangni bidingo Forest Department aro NGO-rang u•iataniko on•a gita program-rangko ong•atna nangenga aro Huro-rangko skatang noktango jilna rim•na man•ja ine u•iatna nangchongmotgen ine aganaha.
Tura Garo Senior Citizens Forum-ba, ia gimaangenggipa matburungrangko gipin biaprangona Garo Hills a•jaoniko jitatenganiko champengataha.
“Central Zoo Authority-ni gita matburungrangko donchakram biaprangona gipin Huro-rangko jitatanio chu•sokgipa ong•engnaba donga, indake ong•genchimoba, ia a•jao donggipa Huro-rangna gipin biaprangona jitathaode dongchakani biap aro climate-rang melijanaba donga aro uamangna neng•nikani ong•naba donga, uni gimin, uamangko jitatgija uamang jeo donga unon dongaichina” ine Forum-ni gita aganaha.
Unbaksana, ia Huro-rangko skang chasongoni A•chik ma•gitcham pagitchamrangan dal•e ra•baenga aro ripinge rakkibaengani gimin, A•chikrangni mingsa gamchatgipa gamba ong•a ineba uamang janapataha.
Indake ong•genchimoba, Sonja Wildlife Rescue Centre-ara damsa rescue centre ba matburungrangko naljokgipa biapsan ong•aiani gimin, ia Huro-rangko uamangni dongchakram biapona watatpilnade nangenga aro indita bilsi ru•utaona mandesa uamangko nirokbaengani gimin, buringona uamangko joljol watatpilgenchimode, uamang rang•gitik buringo janggi tangna neng•niknaba donga, uni giminsa uamangko Zoo ba matburungrangko donchakram biapona jitatchengenganiara nambatgipa ong•enga ine sorkari talataniko dakatskaaha.
Na·simang ia video-koba nina man·gen:
Na·simang iakoba poraina man·gen: Gitcham Minister James K Sangma, Gambegre By-Election-ni bidingo media-o tol•e kobor on•enganiko jegalata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
