Shillong, June 6: Salsa salgnini gisepon Reservation roster-ni Office Memorandum (OM) ong•katna siengahani gimin a•dok sorkari, dingtang dingtang department-rango kamo ra•aniko a•bachengpiltaina tik ka•aha ine Mongolbar salo Cabinet tom•a matchotani ja•man, Meghalaya a•dokni Chief Minister Conrad K Sangma parakataha.

Chief Minister-ni parakatani gitade, Cabinet-ni tom•anio reservation roster-o tarina sienggipa Office Memorandum-ni bidingo chanchirimangaha aro da•o Office Memorandum-o taridapna nanganirang matchotahani gimin reservation roster-ni OM ong•katahaon, dingtang dingtang kamo ra•aniko a•bachengpiltaignok.

Job Reservation Policy-ni roster system-ko ra•gatani bidingo jinma chanchirimkujaskal pilak sorkari department-rangon kamo ra•aniko dontongkuchina gita Voice of the People’s Party (VPP)-ni dabienggipani gimin janapatengon, kamo ra•aniko dontongatgenchimode dingtang dingtang sorkarini kamna dorgasto galenggipa chadamberangni bilsina nangchakeaniko ra•bagen, uni gimin kamo ra•anikode dontongna man•jawa ine Chief Minister parakataha.