Shillong, May 10: COVID sajinmani a·doko rang·san tang·doani gisepon, re·baenggipa antioni ia sabisini ka·sinsin komiroroanggnina Director of Health Services (MI) Dr Aman War an·tangni ka·dongsoaniko parakangaha.
Shillong, Civil Hospital-o Covid sabisini gimin nipiltaianiko dakangani ja·man koborna agananio, a·doko lockdown-ko ra·gatanichi re·baenggipa antionide sabisini mamlarang tang·onangna gita uamang ka·dongsoenga ine Dr War parakaha.
Ru·utgija salrangna skang mangmang ra·gatanggipa chu·gimik chipchangatanichi, sabisini mamla rang·sande tang·onjawa ine aganengon, sabisiko giproroatgipa virus-ko
champengnasa ia lockdown-ko ba chu·gimik chipchanganiko ra·gatataha ine ua talataha.
“Re·anggipa antio mai ong·ahachim ukon da·o mesokenga,” ineba Pa War agandapataha.
Uni aganangkuani gita, a·dokni nokanti aro nokprakprakon manderang an·tangtangni bebera·enggipao sabina bi·anirangkoba daktokenga, uni gimin Isolni ka·saachi ia sabisi baksa dakgrikanio an·chingni a·dok chegipa ong·telgen.
Obostarang nama ong·jaenga ine aganengon, an·chingni neng·nikani somoirang ru·utgijan an·ching gimikni bakrimanichi chel·angchongmotgen ine Dr War ka·dongataniko on·angskaaha.
“Nambatgipa biapara noktango napchipe donganian ong·a, na·a ong·katode sakgipinrango sabisiko batatasan ong·aijawa indiba nang·ni noksulrangonaba batatgen,” ine ua agankuaha.
Ua indineba aganaha, bang·a-bang·gija saani rokom donggipa aro saani maming chinko mesokgijagipa aro minggipin sadapanirang be·enno donggijagiparangnade sorkari, sagipani noktangon sana-banani cholko on·enga.
Iana skang, a·dokni Health Minister Pa AL Hek-ba lockdown-ko ra·gatanian nangchongmotgipa ong·a aro pilak dongimin niam aro ge·etanirangko manderang namedake ja·rikna nanggen ine aganangahachim.
Unomiting, Shillong Civil Hospital-ni Joint Director (SS), Dr Andreas Dkhar-ba sabisini batrikrikenganio iana chu·onge sana-bananiko on·na gita sorkari, dingtang dingtang biaprangni sanchakram biaprangkoba namdapatenga ine parakataha.
Shillong Civil Hospital-o da·odipet chu·onga gitan oxygen aro ventilator-rang donga ineba ua agan-talataha.
Janapjolna gita, sajinmani mamlako a·doko salsani gisepon sak 300 oni sak 400 mangna baten segatenga aro batanggimin salgittamni gisepon sak 30 na baten manderangba ia sabisiko man·e siangtokaha.
