Tura, May 10: Sombar attamchibara Garo Hills Autonomous District Council (GHADC)-ni chief executive membor (CEM) Benedic R Marak-ni dilanichi gital executive committee-ni dilgiparang, Non Gazetted Employees Association (NGEA)-ni dilgiparangko gronge agangriktaiani ja•manoba GHADC-o kam ka•giparang, kamrangko ka•gija jingjengataniko ra•galpilna jechaktaiaha.
NGEA-ni dilgiparangko apsan agangrikna gita Sombar salo, GHADC-ni CEM, an•tangni office-ona okamatahachim aro ia tom•anio GHADC-ni chairman Rakesh A Sangma baksana executive committee-ni gipin dilgiparangba dongpae bakko ra•angahachim.
Ia tom•anio NGEA-ni dilgiparang baksa agangrikengon, jingjengataniko ra•gale Mongolbar sal dipet kamrangko ka•taipilchina GHADC-ni CEM, NGEA-ni dilgiparangko didiahachim indiba GHADC-o kam ka•giparang jingjengataniko ra•galna gita jechaktokaha.
GHADC-o kamrangko ka•gija da•o jabri batangpilengahani gimin tangka paisani gita neng•nikanirangko man•engaha ineba GHADC-ni CEM, NGEA-ni dilgiparangna talate on•na jotton ka•ahachim.
A•dok sorkarini dakchakanichi GHADC-ni executive committee, kam ka•giparangna jabongani dormaharangko on•na gita tangka paisarangko chimongna man•aha indiba kamrangko ka•piltaie dormahani nanggipa lekkarangko tarimanosa tangka paisarangko watatgen ineba Marak, NGEA-ni dilgiparangna talate on•ahachim.
Indake ong•genchimoba, komibeoba bilsisani dormaharangko gital pay scale-o on•genchimosa GHADC-o kam ka•giparang jingjengatanirangko dontonge kamko ka•piltaigen ine NGEA-ni dilgiparang, jingjengataniko dontongna jechaktokaha.
