Shillong, May 12: Saliram Ri Bhoi a•jani Khri chiringo bisi rudapani a•sel ritchani ritcha na•tokrangni sie dongako nikna man•aha ine kobor on•aha.

Koborko on•ani gitade, ia obosta May 11 tarikon ong•ahachim indiba internet-o iani bidingo video-ko watatani ja•mansa manderang ma•sina man•aha.

Ia video-o mande saksa an•tangni ripengrang baksa kg 80-mang ong•pilgipa na•masuko chile ra•angako nikna man•ahachim.

Patharkhmah Police Outpost-oni koborko on•ani gitade, Saliram Ri Bhoi a•jani ning•o donggipa dingtang dingtang songni manderang, na•tokrangko siatna gita chiringo bisi satahani a•selsa ia chiringni na•tokrang bang•en siako nikna man•aha.

Ia a•selni bidingo am•sandianirangko dakenggipa police-rang, manderangoniko depgittim sambisirangkoba sekna man•aha ine u•iataha.