Shillong, April 19: Ri Bhoi a•jani Umskun songo ge•gipa pang 2000-mangni gita wa•a chararangko ma•sina man•gijagipa manderang, so•e galangaha ine Mongolbar salo, Ri Bhoi Tourism & Environmental Development Forum-ni president Plielad Tiewsoh parakataha.

Koborko on•ani gitade, ia a•sel re•anggipa April 12 tariko ong•aha aro ia wa•a chararangko skatang so•e galani a•sel samtangtango ong•telaigiparangna nangchakeaniko ra•baaha.

Tiewsoh-ni parakatani gitade, ia wa•a chararangko North East Cane & Bamboo Development Council-ni scheme-ni ning•osa ge•ahachim aro da•o ia wa•a chararang, feet gni ong•bapilengahachim.

Ia a•sel ong•aniko jegalatengon, iandake buring bolgrimrango donggipa sam bolrangko nisie galaniara samtangtango ong•telaigiparangnasan ong•aigija matburing aro chiring chibisikrangnaba nangchakeaniko ra•bagen ine Tiewsoh, mikrakataniko on•angaha.