Nongpoh, March 8: “Ra·bianiko mikkangchakna baseani” ine pangchakaniko donenba AADYA baksa nangrime Meghalaya-ni Ri-Bhoi, Baridua-o donggipa University of Science & Technology Meghalaya (USTM)ni campus-o a·gilsak gimik baksa Sombar salo “Me·chikrangni Sal” ko nambee maniangaha.
Tom·anio, Agricultural and Processed Food Products Export Development Authority-ni Assistant General Manager (Regional Incharge), Ma Sunita Rai mongsongbatgipa sokgipa ong·e bak ra·angan baksa USTM-ni Chancellor, Shri Mahbubul Hoque, USTM-ni VC, Prof. G.D Sharma aro officialrang, skigiparang aro chatro-chatrirang gimikba bak ra·angtokaha.
Salni tom·anio, Entrepreneurship, Women Empowerment aro Societal-ni a·bao bang·en on·gilanirangna dingtangmancha mande ra·ani gita ‘USTM Woman of Substance Award 2021’ boksisko USTM-ni Vice Chancellor, Prof. G.D. Sharma-ni jakchi Pride East Entertainment Pvt Ltd-ni Chairman aro MD, Ma Riniki Bhuyan Sharma-na pakwatangaha.
“Songsalko namroro-silroroatanio me·chikrangko bil gnangataniara namen gamchata. Jedakgipa gadangoni ong·oba me·chikrangna pilak a·barangon apsan cholko on·na nanga” ine aganan baksa, USTM-o da·o 57 percent chatrorangan aro 75 percent staff-rangan me·chikrangsa ong·a ine da·alo janapjolna krachongmota ine USTM-ni Chancellor, Hoque, tom·ao mikkangko mesokachi mangmang bakko ra·ange aganprakangaha.
Me·chikrangni salko maniani bak gita, USTM campus ning·o sanitary pad-ko tariani ge 12 kolrangko a·bachengate on·angan baksa, ua joloni me·chikrangna rongtal-an·tale aro an·seng-baljoke dongna nangani bidingo Health and Hygiene camp-koba indin ong·atangjolaha.
‘Organic Hut’ ba joltango man·gipa bosturangko palchakani noktopko a·bachengate on·aniba tom·ani mongsonggipa bak ong·jolaha. Ian USTM-ni Department of Rural Development-ni kam ka·chatani ong·enga jeon ua jolni wilwilao songdongenggipa me·chikrangna uamangni game-ge·e man·gimin bosturangko university campus ning·o antio chang-gni dake palna gita cholrangko on·aha.
“Mechikrangni jaanti nikaniko ong·gija bebera·ani aro ja·rikbewalchi me·chikrangni jakgitelaniko champengani” ingipao pangchake jera-ra·griksuaanikoba salni tom·anio ong·atangjolaha jeon university-o poraienggipa chatrorang bak ra·angtokaha.
