Shillong, Nov 3: Salgittamna ong•atenggipa Rising Sun Water Fest 2022-ko Bristibar salo, Meghalaya a•dokni Chief Minister Conrad K Sangma, Umiam Sports Complex-o do•ga oe on•angaha.
I wish all the participants the very best. May the best club win! pic.twitter.com/NaAjYk20Bf
— Conrad Sangma (@SangmaConrad) November 3, 2022
Ia Rising Sun Water Fest-ko do•ga oe on•anganio a•dokni Chief Minister, jinmana aganprakangengon, ia program-ko ong•atenggipa manderangna an•tangni namgipa skaniko on•angenba, ia water festival-ko a•doko skanggipa changna ong•atenga ine parakangaha.
Meghalaya a•doko chiring chibisikrang, chidarerang, warirang aro uandake samtangtango nitobee ong•telaigipa biaprang bang•en donggenchimoba da•onan manderang iarangni namgnirangko ra•na man•kujaenga ine janapatengon, iandakgipa biaprangchi tourism-ko tang•doatna gita cholrangko ra•china ua a•dokni manderangko didiangaha.
Batanggimin bilsirango COVID sajinmani a•sel bang•a neng•nikanirangko aro ra•bianirangko chagrongna nangahaoba a•dokni manderangna janggi tangani cholrangko on•na gita a•dok sorkari, samtangtango ong•telaigiparangko jakkale Tourism-ni kamrangko tang•doatpilna kam ka•aha ineba Sangma aganaha.
Iandakgipa program-rangko a•gilsak gimik bak ra•na man•na gita bilsiantian ong•atjringna sorkari jotton ka•enga ineba Chief Minister parakataha.
Khelo India Program-ni bak gita Indian Army aro Meghalaya sorkari nangrimenba, skanggipa changna a•doko ring chosusaanirangko ong•atenga aro ia program-o a•song gimikon dingtang dingtang dolrang bakko ra•angtokengachim.
Ia Water fest-o cultural exhibition, food fest, art & craft exhibition aro chio kal•susaanirangko ong•atenga.
