BUENOS AIRES, Nov 26: Anti-gnimangna skang, taningo an·chi tin·kae dongako surgery ka·ange hospitaloni jokanga ja·man, robol kal·na namen sapgipa ong·anio a·gilsak gimikchin bilongen mingsing-minggama man·pilgipa Argentina-ni Diego Maradona, bilsi 60 gape mijal Butbaro ka·tong sagitike a·gilsakko watangaha.
Sianggipa Maradona, mija November 3 tariko rate sananiko dakangaha (surgery) jeni ja·man uko dingtangmancha niroke sanenggipa doctor Leopoldo Luque-ni aganani gitade, uni be·enni namgnina ringa-cha·ako dontonganichi ua (Maradona) gisiko jajaani gnang saaniko man·engachim. Indake ong·oba, hospitaloni ong·katangna name adita an·sengpilani ja·man uko Buenos Aires-ni a·pal salgrochipakgipa Tigre-china rimangaha. 1986 bilsini FIFA World Cup-ko chedilgipa, be·eno saanirangko neng·e dakgrikbae chu·sokani ja·man name-an·sengen dongengachim, ine uni ukil Matias Morla aganaha.
Pilak somaion gipinrangna bate nambate kal·gipa ine manderangchi aganako man·pilgipa, skang 1986 bilsini World Cup-na robol kal·susaange Argentina-ko cheatani somaio uan (Maradona) dolni captain-ba ong·achim. Mikkango donge kal·gipani ua tournament-o dingtang dingtang dake an·tangni changa-sapanichi ga·sue kal·anirangkoba nikangna man·aha, jeoni mingsa namen gisik ra·na krabegipao uni gol chipaniara England a·song baksa semi-final-ko kal·susamitingo ong·aha aro ua somaionin ‘Goal of the Century’ ine manderangni biming donpilako ua man·aha. Ua, gimik sak 6 England-ni kal·giparangni mikkang gita jatchioni robolko ra·rorobaenba ua somaio golko chipaha.
Buenos Aires-ni a·palo salgipengchipak namen kangalbegipa nokdango 1960 bilsini October 30 tariko atchie, Buenos Aires-oni Argentinos Juniors-na 1976 bilsi jolo ja·delgimin manderang baksa kal·na gita ua cholko man·chengaha. Indaken, 1981-82 bilsini kal·anirangoba, Argentine-ni rakgipa dol Boca Juniors-na kal·bae on·kuaha. Ua, uni ja·man Europe-china jitangskaeming changgni kal·anirango Spain a·songni niksenggipa dol Barcelon-na kal·e on·angskaaha. Indake ong·oba, Catalan club-na uni kal·e on·anganiara 1984 bilsini Copa del Rey-ni finalko kal·ango nigipa mande jinmani kajia-golmalona sokpilachisa matchotskaaha.
Maradona, uni ja·manba Italy a·songni niksenggipa club Napoli-na kal·e on·angtaikuaha. Club-na gimik chang-snirangna uni kal·e on·angani somaio, Coppa Italia-ni ge·gni Serie A title aro ge·sa UEFA Cup-koba chedilaha, jechin baanggimin 2017 bilsio saksa Marek Hamsik minggipani bang·a golrangko chipachi gital dake segatkujana kingkingde pilak somaion uamang club-oni uan(Maradona) bang·bate golrangko chipgipa ong·e dongaha. Robol kal·e namgipa bimingko sebaanio uni bon·kame Boca Juniors-na kal·chotangna skangba, Spain a·songni club Sevilla aro Argentina-ni club Newell’s Old Boys-na changprak kal·e on·angkuaha.
Saksa coach ong·e dangdike on·anganioba, sianggipa Maradona batanggimin 2008 aro 2010 bilsirangni gisepo Argentina-ko name chu·soken nirokangna gita man·aha. Uni bon·kame a·gilsakko wate re·angani somaio, Argentina-ni dolsa robol kal·ao niksenggipa Gimnasia y Esgrima-ko nirokengachim.
