Shillong, Feb 8: Budbar salo, Meghalaya a•dokni Chief Minister Conrad K Sangma, South Garo Hills a•jani Rongara jolo donggipa Gulpani Nokat songo Jackfruit Processing Unit-ko kulie on•angaha aro ia processing unit-ko kulie on•anganio, Rongara-Siju-ni MLA Rakkam A Sangma, Baghmara-ni MLA Kartush R Marak, Amlarem-ni MLA Lahkmen Rymbui, GHADC-ni Chief Executive Membor (CEM) Albinush Marak aro gipinrangba dongpae bak ra•angtokaha.
Ia Jackfruit Processing Unit-ko kulie on•anganio a•dokni Chief Minister, jinmana aganprakangengon, ia karkanako songni manderangna kulie on•na man•ahani gimin an•tangni kusi ong•aniko parakangenba, iandakgipa karkanarangko te•brongnasan ong•aigija songo noko man•gipa ma•manti bolam bite, me•su samjak aro gipin bosturangoniko dingtang dingtang bosturangko tarina gitaba sorkari kam ka•enga ine aganangaha.
Meghalaya a•doko somoini kri dingtang dingtang bolam bite aro me•su samjakrangko man•engoba manderang iarangoniko an•tangtangna man•dapanirangko tarina man•jaengani a•sel, songo noko man•gipa bolam bite aro me•su samjakrang indin so•e bon•rongaia ine janapatengon, iani giminsa sorkari, game ge•e cha•enggipa manderangni man•gniko bariatna gita dingtang dingtang program-rangko a•bachengataha aro sorkarini a•bachengatgipa dingtang dingtang mission-rang, jekai Lakadong Mission, Ginger Mission, Jackfruit Mission aro uandakgipa program-rang songo noko manderangna janggi tangani cholrangko on•engaha ine Chief Minister parakataha.
Gong crore 2-mang koros ong•e rikgipa Jackfruit Processing Unit-ko 100 KW solar power unit-chisa chalaiani gimin ian ong•telaigipa bilko jakkalna cholrangkoba on•enga ineba Sangma aganaha.
Te•brong nangkari somoio salantian songni manderangoniko gong lak 1.5-oni gong lak 2-mangni gita te•brongrangko bree ia processing unit-o te•brong chips, te•brongni moida, te•brong jam aro uandakgipa ma•manti cha•ani bosturangko tarigen aro iana dingtangmancha sak 150-mangni gita me•chikrangna skie on•enba kamo rakkigen ineba Chief Minister parakataha.
Chief Minister-ni parakatani gitade, ia processing unit-ko Rongara Agro Food Processing Cooperative Society chalaigen aro ian South Garo Hills a•jani sak 5000-mangni game ge•e cha•giparangna namgni ong•an baksana jolni chadamberangnaba kamrangko ka•e cha•na cholrang ong•gen.
South Garo Hills a•jao namroro silroroaniko ra•bana gita sorkarini ka•enggipa kamrangni bidingo janapatskaengon, Ranikor-Rongara-Baghmara ramako tariani da•o matchotna siengaha aro Baghmara-ni Captain Williamson Sangma College-o Science aro Commerce stream-koba a•bachengna siengahani gimin ian South Garo Hills a•jao songdongenggipa pilaknan namgni ong•gnok ine Sangma aganangaha.
Ia tom•anio a•dokni Education Minister aro Rongara-Siju-ni MLA Rakkam A Sangma-ba aganprakengon, Rongara-o processing unit-ko kuliahani gimin ian te•brongni gamchatanikosan ong•aigija songo noko man•gipa dingtang dingtang bolam bite aro me•su samjakrangni gamchatanirangkoba tang•doatna dakchakgnok ine parakataha.
South Garo Hills a•jao lekka porako tang•doatna gita ma•a paarangko aro chatro chatrirangko lekka porao gisik nangchina gitaba Education Minister didiangaha.
Iakoba poraie nina man·gen: Uttarakhand-o Uniform Civil Code-ko pass ka·a; Tribal-rangna nangeani dongjawa
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
