Shillong, June 19: Meghalaya Forest Department-ni gita Sacred Groves ba rongtalgipa bolgrimrangko Community Reserve ine ma•mongni gita parakatchina aro iarangko ripinge rakkianio tangka paisani gita gong crore 24.74 tangkarangko dakchakatchina mol•molataha.
Sacred Groves ba rongtalgipa bolgrimrangko, United Khasi-Jaintia Hills Autonomous District (Management and Control of Forests) Rules, 1960-ni ning•o janapatgimin gita Autonomous District Council-rangko iandakgipa bolgrimrangko segatna nangchongmotachim jekon, da•alonaba dakkujaengachim aro ia ripinge rakkienggipa bolgrimrangko register ka•jagenchimode, niam gita naljokatanirangko on•a man•jawachim.
Meghalaya a•dokni nitogipa buring bolgrimrangko, jolo donggipa manderang uamangni jatni dakbewalrango bebe ra•baenga gita ru•uta bilsirangnan naljoke aro chel•chake ripingbaenga. Indake ripinge rakkianichi, a•a ruaniko naljokatna, chimikrangko tangatna, rongtalgipa chirangko man•atanio dakchakani ong•a aro unbaksana, buring bolgrimrangko nosto ong•ataoniko naljokatna aro matburungrangko ripingnaba dakchakani ong•a. Bilsi karirang dingtangroroengon, iandake darangni dangtapkugijaenggipa buring bolgrimrangni gamchataniko nikna man•engaha.
Iandake rongtalgipa bolgrimrangko, Community Reserve ine niam gita ra•chake naljokatanina dakchakaniko on•gen aro ma•mongni on•enggipa Scheme, jekai, ‘Integrated Development of Wildlife Habitats’ scheme-ni ning•o tangka paisani gita dakchakaniko on•gen ine Skotong Minister Conrad Sangma aganaha.
Ua, sandirikitaniko dakenggipa dolrangko mongsongbate, Research and Training-ni PCCF Working Plan, Mr H C Chaudhary-ko, gisik nange sandirikitaniko dake data-rangko chimongahanina mitelpilskaaniko dakangaha.
Uamangni sandirikitaniko dakanichisa pilak rongtalgipa bolgrimrangko, United Khasi-Jaintia Hills Autonomous District (Management and Control of Forests) Rules, 1960-ni janapgimin gita an•tangtangni Autonomous District Council-rango ba segatkuja ine u•ina man•aha.
Indake, ia buring bolgrimrangko District Council-rango segatgijaniara, gipinrang biaprangko sin•chepe ra•seknaba altua, uni gimin, iarangko segatgenchimode niamo pangchake chel•chaksona man•a gita sima arirango krongrangko songe dona man•a. Una agreba, rongtalgipa bolgrimrangko ripinge rakkina nangchongmotani gimin aro ua jolo songdongkamenggipa manderangnaba janggi tangani cholrangkoba u•iatna nanganiko ia report-o janapataha.
Wildlife (Protection) Act, 1972-ni Section 38C-ni ning•o, National Park, Wildlife Sanctuary ba Conservation Reserve-ko donchange, je buring bolgrimrangko songni gita ba jeba, Sam bolrangko aro jatni dakbewalrangko gamchate ra•e chel•chake rakkina ripinge rakkina gita kang•kare ka•genchim, ua biaprangko a•dok sorkarini gita Community Reserve ine parakatgen.
Indake, bakrobate buring bolgrimrangko ripingna man•a gita, Research & Training-ni Working Plan aro Forest-ni District Council Affairs Wing aro Forest Resources Survey Division-ni Environment Department-ni gita, a•dok ning•o donggipa rongtalgipa bolgrimrangko sandina aro biapni sima arirangko salna a•bachengataha. Forest Inventory of Sacred Groves, Meghalaya-ni mesokgimin Volume I aro II Report-rango, bilsi 2017 aro 2022 bilsimangni gisepo dam 20 rongtalgipa bolgrimrangko janape seaha aro 2022-2023 bilsirangko sandianio, East Khasi Hills a•jao dam 24 rongtalgipa bolgrimrang donga ine Volume III-o janape seskaaha.
Forest Resources Survey Division-ni gitaba, dam 69 rongtalgipa bolgrimrang, Khasi Hills aro Jaintia Hills a•jarango gnang ine 2024-2025 bilsina sandianiko dakanio u•ina man•aha.
Na·simang ia video-koba nina man·gen:
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
