Tura, March 29: Meghalaya a•doko Job Reservation Policy-ko rakkina ra•gatenggipa Roster system-ko Voice of the People’s Party (VPP)-ni jegalengani gimin A•chik Conscious Holistically Integrated Krima (ACHIK) minggipa dol sing•doatenba, VPP-ni kamna suk ong•gijaniko parakataha.
Roster system-ko jegalengani gimin an•tangni suk ong•gijaniko parakatengon, ian a•doko songdongenggipa Tribal-rangni gisepo mitchigrikaniko ra•bana jotton ka•ani gitasa ong•enga ine ACHIK dolni ku•pattitimgipa Bernita Rangsa Marak, VPP-ni MLA-rangko matnangataha.
Marak-ni parakatani gitade, a•doko songdongenggipa jatrangna bak rengsiko tikatna gitasa a•dokni pagitchamrangan Khasi-Jaintia-rangna 40%, Garorangna 40% aro gipinrangna 20% ka•e job reservation policy-ko tariaha aro iako rakkina gita Meghalaya High Court-sa Roster system-koba ra•chake on•angahachim.
Indake ong•genchimoba da•o reservation policy-ko nipiltaichina dabie, Roster system-ko VPP MLA-rangni jegalaniara namen ra•chakna man•gijani ong•enga ine ACHIK parakataha.
“High Court-ni on•gimin raini kosako VPP-ni ku•rang on•ani aro ja•ku de•aniara namen kragijani ong•a maina a•doko dingtang dingtang jatrangna tikatgimin job reservation policy-ko ja•rikna gitasa Roster system-ko High Court ra•chake on•aha,” ine ACHIK dolni ku•pattitimgipa Bernita R Marak parakatenba, ia niamrangko pe•e A•chik jatni kosako ja•kurangko de•genchimode VPP-ni kamrangko nie dongchajawa ine mikrakataniko on•angaha.
Iakoba poraie nina man·gen: Loyola Secondary School-ni Annual Sports Meet a•bachenga
