Williamnagar, March 29: Williamnagar-ni Dawagre-o Jesuit dolchi chalaienggipa Loyola Secondary School-ni Annual Sports meet, March 29 tarikoni nambee a•bachengaha.
Ia School-ni Sports Meet-ko East Garo Hills a•jani Deputy Commissioner Jagdish Chelani, District Sports Officer Babira G. Momin, Superior of East Garo Hills Jesuits, Fr. PJ James, District Science Supervisor, Samuel K. Sangma, Ferrando Secondary School-ni Principal Sister Merabilis Kurkalang aro Loyola Secondary School-ni gitcham Principal Fr. Samir Talati SJ-ni dongpaanio oprake on•aha.
Ia sports meet-ko a•bachenganio, Loyola Secondary School-ni Principal, Fr. Robert Sj, East Garo Hills a•jani Deputy Commissioner-ko rimchaksoan baksa, sokbagipa sakantikon ia sports meet-ona re•baahanina mittelpilangaha.
Deputy Commissioner Jagdish Chelani, mongsonggipa sokgipa ong•e aganangengon, ia sports meet-o bakko ra•pana man•ahanina an•tangni kusi ong•aniko parakatenba, sports kal•ani namgnirangni gimin bi•sarangna agane, kal•susaenggipa sakantinan an•tangni namgipa sikaniko on•angaha.
Ia annual sports meet-ko oprakani salo, Loyola Secondary School-ni chatro chatrirang, sokbagiparangko an•saoatna gita dingtang dingtang chrok-mesaanirangko dake mesokangaha aro adita kal•susaanirangkoba kal•angaha.
