Shillong, Jan 11: Robol kal•susagipa dol Ryntih FC aro Minerva academy, a•joltangni robol kal•susagiparangna dakchakaniko on•a aro uamangko tang•doatna ine miksonge, dolgni nangrimgrike soi ka•grikangaha. Minerva academyni general manager Harshit Tyagi aro Ryntih FCni Samran Syiem baksa Walam Kharpran, dolgnini dilgiparang kobor ra•timgiparangna Press Conference-o aganaha.
Ryntih FCni CEO Samran Syiem kobor ratimgiparangna aganengon, a•joltangni chadamberangna robol kal•susaanio ba gipin kal•susaanirango tang•doaniko ra•bana gita uamang Diengpasoh community baksa ku•monge tik ka•grikaha.
Diengpasohni Dorbar Shnong, acre 15 a•akoba bilsi sotbrina uamangna on•somanaha, aro robol kal•aniko skichakramko rikaninaba Minerva academy baksa ku•monggrike segrik-jotgrikaha ine koborna u•iataha.
Segrik-jotgrike ra•gimin gita Diengpasoh-o rikna sigipa robol kal•chakaniko skichakram nokko nirokna aro silroroaniko ra•bana Minerva academy Ryntih FCna dakchakaniko on•gen aro iani gimin sombar salo ua biapko nina aro sandirokna re•angaha.
Minerva academyni Diengpasoh-o rikna sigipani bimang ba noksako tarisamsona Shillong club chanchisoenga. Minerva academyni tom•ani aro ranta ka•anirangko Shillong songjinmao Ryntih academyon nokchakgen, jeon Minerva academyni coach ba skigiparangba dongpana man•gen.
