Shillong, Nov 22: Meghalaya a·doko Covid sajinmani tikako su·ani baditana kingking chu·sokaha ba chu·sokkuja iarangni bidingo nipiltaianiko dakna ma·mongni Health minister Dr. Mansukh Mandaviya baksa Sombar salo tom·aniko ong·atanggipao Meghalaya health department-ni a·gipi officialrang bakko ra·angtokaha.
NHM-ni Director Pa Ram Kumar-ni aganani gitade, re·anggipa anti-gni ba anti-gittamna skang a·songni Prime Minister baksa Video Conference-ko dakangani ja·man da·o je manderangan sajinmani tikako su·tokkujaengachim saksakoba watchanggija gimikkon matchote su·ani gimin uamang mongsongbate gisik on·e kamko ka·enga.
Pa Kumar-ni aganangkuani gitade, a·dokni mitam district-rang jekai South West Garo Hills aro East Jaintia Hills a·jarango 80% mang ong·na am·pile tika su·ani namen chu·sokaniko nikna man·aha jeon bangki district-rangode namen komiaha.
“Songjinma ba jillarango sajinmani tikako su·ani namen tang·doaha indiba songadam biaprango da·oba tang·ongkuenga. Wachini somoio manderangko tika su·na gita neng·nikanirangko man·aha uni gimin, da·alo tom·ani ja·man a·dokni skotong minister baksaba agan-golpogrikangaha jean nokantichina re·e tikako su·ani gimin nisanko donataha,” ineba Pa Kumar agandapataha.
Unbaksana, re·baenggipa Krismas-na skangan man·adipetde pilak tika su·na man·giparangna skanggipa dose-ko matchote on·na man·na gitaba health department miksongenga ineba ua u·iatjolaha.
