Shillong, March 31: Budbar salo Meghalaya a•dokni Chief Minister Conrad K Sangma, Mairang-ni Dorbar Hall baksana PWD rama aro VIP gallery-ko a•bachengate on•angaha aro ia biaprangko a•bachengate on•angani somoio Meghalaya Legislative Assembly-ni Speaker Metbah Lyngdoh, Water Resources Minister H Brolding Nongsiej aro PHE Minister Renikton Lyngdoh Tongkhar-ba dongpae bak ra•angaha.
Ia Dorbar Hall, PWD rama aro VIP gallery-ko a•bachengate on•na gita tom•aniko ong•atanio a•dokni Chief Minister jinmana aganprakangengon, ia salara Mairang-o songdongenggipa manderangni neng•nikanirangko chanchirimna gita cholba ong•enga ine parakangaha.
A•doko songdongenggipa manderangna namroro silroroaniko ra•bana sorkari rakbee kamrangko ka•enga ine janapatengon, 2020 bilsio COVID-19 sabisi giproroahani a•sel neng•nikanirangko chagrongna nangahaoba ia bilsini gisepo a•dokna bang•a namroro silroroani kamrangkoba a•bachengatskana man•aha ine Chief Minister aganaha.
Da•o bilsisa bilsignini gisepon a•dok sorkari, Meghalaya a•doko lekka pora, an•seng baljokani aro manderangna chel•chakaniko on•ani a•barango kamrangko namdapatna ja•kuko de•engaha ineba Chief Minister parakataha.
Re•anggipa bilsionin United Nations-ni ra•gatgipa Sustainable Development Goals (SDG) model-ko Meghalaya a•dokoba daksningna jotton ka•e, a•doko tosusae nion South West Khasi Hills aro West Khas Hills a•jarango nirok sandianiko nangbatenga ine nikahani gimin Mairang-o administrative unit-ko sorkari kulina nangnikenga aro Mairang sub-division-ko bakan district-ona ra•doatgen ineba Chief Minister parakataha.
Meghalaya a•dokni dingtang dingtang biaprango district aro administrative unit-rangko songchina dabitokengani gimin ia dabianirangko High Level Committee-ni gita nipilanggen ineba ia tom•anio Chief Minister parakataha.
