Shillong, Dec 01: Dolo da·omiting padot ong·e kamko ka·enggipa Pa James Lyngdoh baksana General Secretary gitcham Dr Manash Das Gupta-maang sakgnini kam watani chittiko on·anganichi Meghalaya Congress Committee-na da·obatai minggipin neng·nikani sokbadapaha.
Iani bidingo Shillong Press Club-o press conference-ko Butbar salo ong·atao aganangenon, da·o MPCC-ni president ong·enggipa Pa Vincent Pala, una kam on·anirangko ra·pilaha aro dolonikoba nichanggalaha ine Pa Lyngdoh matnange aganangaha.
“Bilsi 33-rangna kingking dolna dangdike on·baoba skangni MPCC president baksa iandakgipa obostako chagrongbaa dongjachim indiba da·o padot ong·enggipa Pa Vincent Pala-sa angna maming kamko on·jana tik ka·aha aro gimikan da·ode angko mamingnaba nangjaha ingipa gita chacha changaltokaiaha,” ine Pa Lyngdoh a·kangataha.
Ia rakbegipa ja·kuko de·na skangba anga ning·tue chanchichengaha ine aganangkuenba, congress dolna ua pangnan an·tangko on·kangpile kamko ka·baahachim ineba Pa Lyngdoh agandapataha.
Kam watani ja·man badia dolo napna miksonganirang donga ine sing·anina, Pa Lyngdoh, da·odipet nisengengkua indiba gipin dolo napna miksongade gnang indiba badia dolo ong·gen uko tik ka·a dongkuja ine aganchakaha.
Indake ong·engon, Dr Manash Das Gupta-ni MPCC-ni padotna kam watani chittiko on·anggipao kamtangko watengani maming a·selrangkon janapatade dongskajahachim.
“Anga ia somoion Labour Department-ni chairman ong·aoni, MPCC aro Chairman-oni, MPCC-ni Vichar Vibhag-oni kamtangko watenga. Adita salrangna skang MPCC-o pilak kamrangko jujaataona kingking MPCC-ni general secretary ong·e bilsi 14-na dangdike on·baa baksa, chu·gimik bilsi 36-rangna kingking dolna kamko ka·baani ja·man, Indian National Congress-ni Primary Membership ong·aonikoba ia somoion anga kam watenga,” ine Pa Gupta uni chittio janapataha.
