Manipur, August 11: All-Tribal Student Union Manipur (ATSUM )-ni saldokna “economic blockade”-ko National Highway-2 (Imphal-Dimapur)-o ong•atenggipako budbar walo ra•galaha aro uandake sorokrango nangchongmotgipa bosturangko salruraenggipa garirangni bon•chongdike donganirangko re•rurana on•piltaianiko jegalaniko dakenggipa dolni manderang aro official-rang u•iataha.
Budbar salo tom•e chanchirimaniko jeteenggipa dolrang baksa dakanio economic blockade-ko ra•galchengna ATSUM General Secretary S.R. Andrea parakataha.
ADC Bill 2021-ni bidingo economic blockade-ko ATSUM-ni ong•atanirangko, songdonggipa manderangni neng•nikanirangna dikdiksana ra•galchengenga indioba gipin cholrangchi jeteanirangko mikkangchi dakangkugen aro uamangni ia jegalanirango bakrimaniko on•enggipa sakantikon mikkangchiba jatni namgnina ja•ku de•anio bakrimangkuchina mol•molanirang baksa u•iataniko on•aha.
Manipur (Hill Areas) Autonomous District Council (Amendment) Bill, 2021-ko Assembly-ona ra•ange a•bri jolrango songdonggipa manderangna chu•onga gita bilrangko jakkalna man•na gita dabianirangko dakanio ATSUM, economic blockade-ko sukrobar saloni ong•atenganiko budbar salo ra•galpilaha ine Manipur sorkarini official-rangba parakataha.
National Highway-2 gita salantio nanggipa bosturangko dal•dalgipa truck garirango salruraanirang, economic blockade-ko ong•atani a•sel soroksamo bang•en jachange dongna nangtokaha. Chel•chakaniko on•gipa police dolrangoni bol 510 garirangko miksongatangtang biapona sokatna dakchakaniko sombar salo on•aha indioba uni ja•mano bol 700na bate truck garirang sokbadapaha aro rama champenganirangko budbar salonan dakangkuanichi bang•bea garirang jachange dongna nangtaiaha.
Manipur Sorkari, robibar aro sombar salrango jeteenggipa ATSUM dolni manderang baksa chanchirimaniko dake soi ka•grikanirangko dakaha aro jetenggipa dolni sak5 manderang, jemangan Aug 2 tariko rim•a man•e sal15-na judicial custody-o Chief Judicial Magistrate-ni jakchi donatako man•ahachim uamangko niamo watpilaniko dakaha.
Manipur Sorkarini gita Tribal Affairs Minister Letpao Haokip aro Hill Areas Committee (HAC) Chairman Dinganglung Gangmmei baksa ATSUM-ni sak 3 dilgiparangni soi ka•grikanio, Autonomous District Council-na bilrangko ra•rone on•na gita Manipur Hill Areas District Council-ni 7gipa Amendment Bill-ko HAC-na pakwataha aro HAC, uko pilak nanga chanchianirangko dakani ja•mansa Manipur Assembly-ona ra•anggen.
Indake ong•engon, ATSUM-ni dal•batgipa dilgipa Sorkari baksa soi ka•grikanirangko ra•chakna man•jawa ine parakatskaaha maina uamangni doloni soi ka•grikgipa manderang, doltangni executive committee-na talatchenggija an•tangtang soi ka•aha ine talatskaaha.
Uandake ATSUM, doltangni Vice President Vanlanlian Khaute-ko doloni ra•galaha.
Rama champenganirangko dake so•sojengjeng ong•atanina sonibar saloni sal5-na mobile data service-rangko Manipur Sorkari a•dok gimiko dontongataha indioba mongolbar saloni watpiltaianiko dakaha.
BJP Sorkari, Chief Minister N. Biren Singh-ni dilanio Manipur (Hill Areas) District Council 6th and 7th amendment bill-rangko batanggipa antio Assembly-o nadoataha.
