Tura, Mar 16: ‘Azadi Ka Amrut Mahotsav’-ni bak gita salgnina Tura-ni District Auditorium-o ong•atenggipa photo exhibition-ko Bristibar salo, West Garo Hills a•jani Deputy Commissioner Swapnil Tembe, a•bachengate on•angaha.

Ia photo exhibition-ko Information & Broadcasting Ministry-ni ning•o donggipa Tura-ni Field Office ong•atenga aro ia photo exhibition-o a•songni jakgitelanina krengdilanggipa pagitcham ma•gitchamrangni noksarang baksana sipai dolrangni jakkalgipa silchidarerangkoba manderangna mesokna gita donaha.

Ia photo exhibition-ko a•bachengate on•angani somoio West Garo Hills a•jani Deputy Commissioner Swapnil Tembe, jinmana aganprakangengon, a•songko jakgitel ong•atna gita an•tangtangko on•kange krengdilanggipa pagitchamrangni kamrangko gisik ra•atpilangenba, uamangni dakmesokanggipa kamrangko pangnan gisik ra•china aro daksningchina gita manderangko didiangaha.