Guwahati, March 18: Salgro salaram a•dokrangan India a•songo namroro silroroani mongsonggipa biap gita ong•gen aro ia jolrangko a•songni gipin bakrang baksa nangdimeatna gita NDA sorkari pilakni gitan re•a doani cholrangko namdapataha ine Bristibar salo a•songni Prime Minister Narendra Modi parakataha.
Assam a•doko Assembly election-ko ong•atna gita re•anggipa February 26 tariko parakatchengaoni skanggipa changna a•songni Prime Minister Narendra Modi, Assam a•dokona re•bae manderangna aganprakangengon, Congress dolni ong•gijagipa niamrangko ra•gatanichi aro tangka paisarangko jakkalsretanichi Assam a•doko jatni daka rikanirang nosto ka•ako man•aha ine matnange aganangaha.
“Assam-ko mongsonggipa biap dake India a•songni salgro salaram a•dokrangko sorkari, namroro silroroanio mongsonggipa biap ong•atna kamko ka•enga,” ine Modi aganaha.
Assam a•dokni salgipeng Karimganj a•jani Bhatgram-o jinmana aganprakangengon, bilsi 30-na skang, Assam a•dokni manderang, Barak Valley-ni dam 15 assembly seat-rangoni saksku MLA-rangko skanggipa seokchengahachim ine parakangaha. Ia Barak Valley-o Assam-ni salgipeng jolo donggipa damgittam a•jarang, chong•motan Cachar, Karimganj aro Hailakandi a•jarang gnang aro ia jolo Bengali ku•sikko agangipa Hindu aro Muslim jatrang bang•batachim.
Prime Minister-ni aganani gitade, ia Barak Valley-o cha aro torang donge namen gam gnanggipa biap ong•achim indiba ia biaprango man•gipa pilak cholrangkon Congress nisie galskaahachim.
Ia bilsio ma•mong sorkarini budget-ko tarianio cha baganrango kam ka•giparangna dingtangmancha gong kror 1000-ko chamaha ine janapatengon, PM-KISAN scheme-ni ning•o Assam a•dokni lak 27 game ge•e cha•gipa nokdangrang tangka paisani gita dakchakanirangko man•enga ine Prime Minister parakataha.
“Congress sorkarini somoio Assam a•dokko bak dakna jotton ka•aha indiba BJP sorkari, pilak kamrangon manderangko nangrimatna kamko ka•skaenga,” ine PM Modi aganaha.
Ia tom•bimonganio Assam a•dokni minister aro BJP dolni dilgipa Himanta Biswa Sarma-ba manderangna aganprakangengon, March 21 tarikoni April 3 tarikona a•songni Prime Minister, Assam-ona baditaba chang re•bae BJP dolna campaign-ko ka•anggen ine parakataha.
Assam a•dokni Barak Valley-o donggipa dam 15 assembly seat-rangna election-ko re•baenggipa April 1 tariko ong•atna siengachim.
Assam assembly election-ni skanggipa bako dam 47 constituency-rangna re•baenggipa March 27 tariko ong•atenga aro uandaken gnigipa bako dam 39 constituency-rangna April 1 tariko ong•atskaengachim.
Assam assembly election-ni result-rangko re•baenggipa May jani 2 tariko parakskana sienga.
