Shillong, Oct 4: India a•songni salgro salaram a•dokrango namroro silroroaniko ra•bana gita rakbate kamrangko ka•china a•songni Vice President M Venkaiah Naidu, Sombar salo North Eastern Council (NEC)-ko didiangaha.
Shillong-o NEC-ni workshop-ko ong•atanio a•songni Vice President-ba dongpae jinmana aganprakangengon, a•songni badiaba bakrango namroro silroroani dongjagenchimode a•songo namroro silroroani chu•gimik ong•na man•kujawa ine aganaha.
Salgro salaram namroro silroroosa India-ba namroro silrorogen indiba salgro salaram jol ja•manchakode India-ba ja•manchakaigen ine Naidu aganaha.
Dingtang dingtang a•barango kam ka•aniko namdapatenba, bang•bata namgnirangko man•china gitaba ua salgro salaram a•dokrangna ku•pattianiko on•angaha.
Dingtang dingtang kamrango chu•sokanina NEC-ko mittelpilangengon, ia chu•sokanirango chu•ongnike dongaigija nambatako ra•bana gitasa kamko ka•angkuchina Vice President didiangaha.
India a•songni jakgitelaoni bilsi 75 gapaniko maniengon aro da•o gipin bilsi 25-na kamrangko tarisoengon, a•songo kangal cha•a sianiko bon•atna, lekka porako tang•doatna, an•seng baljokani kamrangko namdapatna aro nambatsranggipa a•songko ong•atna nangengani gimin Naidu aganangaha.
Ia workshop-ko ong•atanio Meghalaya a•dokni Chief Minister Conrad K Sangma, Union DoNER Minister G Kishan Reddy, DoNER-ni Minister of State BL Verma aro gipin dilgiparangba dongpae bak ra•angaha.
