Shillong, Oct 4: Salgro salaram a•dokrango rama jal•langrangko tarie on•e namroro silroroaniko ra•baanian India sorkarini mongsonggipa daito ong•enga ine Sombar salo, Union Road Transport & Highways Minister Nitin Gadkari parakataha.

Sombar salo, Shillong-oni Dawki-ona dakanggipa ramako tarina gita a•songni Vice President M Venkaiah Naidu-ni pangchakaniko songe on•angani somoio Union Minister-ba an•tangni chipe ra•gimin video-ko watate, ia kattarangko parakataha.

Shillong-Dawki ramani gimin janapatengon, ian India aro Bangladesh a•songni gisepo meli nangrimaniko aro bading chiwalgrikaniko bilakdapatna gita namen nangchongmotgipa rama ong•a aro ia ramako taridapanichi a•song damgnini gisepo re•grik dogrikaniko altubatatna dakchakani ong•gnok ine Gadkari parakataha.

Meghalaya a•dokna pilak nanga dakchakanirangko on•gen ineba Gadkari, Meghalaya a•dokna ku•rachakaniko on•ataha.