Mendipathar, Jul 30: India a•songni salgro salaram jolrango dal•batsranggipa bottling plant-ko Budbar salo, Meghalaya a•dokni Chief Minister Conrad K Sangma, North Garo Hills a•jani Mendipathar-o kulie on•angaha.
Varun Beverages Limited (Pepsi Co)-ni bottling plant-ko Mendipathar Industrial Area-ni acre 37 ong•gipa biapo kuliaha aro ia karkanako kulianio gong crore 340 tangkarangko koros ka•aha.
Ia bottling plant-ko kulie on•anganio a•dokni Chief Minister, jinmana aganprakangengon, ia karkanako kulianichi kamrangko ka•e cha•na cholrangko on•gnok aro ian jolni manderangna bang•en namgni ong•e ia project-ara manderangna pattiani gita ong•enga ine parakataha.
Garo Hills-o iandake dal•begipa karkanako kulianichi chadamberangni miksonganirangko bilakbatatgnok ine janapatengon, ia karkanao chadamberang bang•en janggi tangani cholrangko nikgenok ine Chief Minister aganaha.
Mendipathar Industrial Area-ko 1990 bilsirangon a•bachengahani gimin manderangni gisepo bang•en ka•donganirang ong•katahachim indiba batanggimin bilsi 30-ni gisepo karkana damsakoba kulina man•jaha ineba ua aganaha.
PA Sangma sagi, ia Mendipathar Industrial Area-ko Garo Hills-na dal•roroani kol gita niksamsoahachim indiba indita bilsirangna karkanarangko kuligiparang dongjahani gimin ua suk ong•jaha ine janapatskaengon, da•alo PA Sangma sagini Mendipathar-na aro Meghalaya a•dokna niksamsogipa jumangrang be•en pil•aha ine Chief Minister aganaha.
Bilsi 30-na skang ia biapo Industrial Area-ko kulina a•arangko on•ahani gimin Mendipathar-ni Nokma aro manderangko mittelpilangengon, indita bilsirangna sengani ja•man da•alo ia biapo karkanako kuliahani gimin 1990 bilsio jolni manderangna ku•rachakgimin kamrang da•o chu•sokgipa ong•gnok ine Sangma parakataha.
Ia karkanao bolam biterangni bitchirang baksana Pepsi Co-ni dingtang dingtang ringani bosturangko tarina aro sualna gita sak 500-mangni gita kam ka•giparangko rakkigen ine janapatengon, ia bottling plant-o gipin cholrangba ong•katgen aro bading chiwalani kamrango tang•doaniko nikna man•gen ine Chief Minister aganaha.
Sangma-ni aganani gitade, ia karkanao kam ka•gipa manderangna dongchakani biaprangko nanggen aro uamangni jolni manderangan nokrangko rike para on•skana man•gen.
Iandakgipa bading chiwalani cholrangko ra•china gita jolni manderangko ku•pattiangengon, chadamberangba gipin cholrangko man•skagen ine Chief Minister parakataha.
Jagni ba jagittamni gisepon Tikrikilla-Bajengdoba jolo dal•bata karkanako kulina siengaha aro kamrang da•o 90 percent-ni gitade matchotaha ineba Chief Minister parakataha.
Ia bottling plant-ko kulie on•anganio Assembly-ni Deputy Speaker Timothy D Shira, Power Minister AT Mondal, PHE Minister Marcuise Marak, MIDC-ni Chairman James K Sangma aro dingtang dingtang MLA-rangba dongpae bak ra•angaha.
Na·simang iakoba nina man·gen:
Na·simang iakoba poraina man·gen: Congress-ni saksakamkam MLA Ronnie Lyngdoh, NPP-o napanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
