New Delhi, April 28: Richter scale-o magnitude 6.4-rang ong·pile Assam aro salgro-salaram a·dok jolgimik gipe Butbar pring 7.51 bajimango bilake banggriangaha. Banggrianichi minit-sana baten mojimangaha.
Iani bidingo Seismology-ni National Centre-ni u·iatani gitade, Arunachal Pradesh-Assam-Bhutan sima-ari gisepgriko donggipa Assam, Sonitpur district-ni Dhekiajuli songoni banggrichakataha.
Batanggimin chasong-brirangni ja·man, Assam-o ianpak skanggipa ong·e bilake banggritaianiba ong·enga. Skang, 1960 bilsi jolo, magnitude 6.0 rang ong·pile Assam a·doko bilake banggriahachim.
Koborrangko man·dapani gitade, banggrichakatgipa biapo mongsonggipa bilake banggriani ja·manoba adita changrang mojimangkuaha. Mongsonggipa banggriani minit 22 mang ja·man, Richter scale-o magnitude 4.7-rang gape gnigipa chang mojimangtaiaha jeni ja·man gittamgipao, magnitude 3.2 ong·e aditan mojimtaianiko u·iriktokaha.
Indake ong·engon, ia obostani bidingo a·songni Prime Minister Pa Narendra Modi, Assam a·dokni skotong minister Pa Sarbananda Sonowal baksa golpoataha aro nanga gita dakchakaniko on·na ku·rachakataha. Apsandaken, ma·mongni home minister Pa Amit Shah-ba Assam-ni skotong minister baksa golpoataha.
“Assam a·doko da·al bilakbee banggriangaha. Sakantini naljokanina anga nokgipao bi·a aro apsandake sakantikon mikrake dongtokchina mol·mola. Pilak district-rangonikon koborrangko ra·roroatenga,” ine Assam a·dokni skotong minister Pa Sarbananda Sonowal, pringo banggriangani ja·man see parakataha.
Koborni gitade, salgro-salaram a·dokni bang·a biaprangon pringni somoio bilake banggrianiko u·iriktokeming bang·a manderangan naljoka biapona noktangtangoni ong·katbildange kattokaha.
Ia banggrianichi, mongsongbate Assam a·doko donggipa mitam nokrang, hospitalrang, hotelrang, bading-chiwalchakgipa nokrang aro manderangni dongchakgipa nokrangni aditan nosto ong·tokanikoba knasoaha aro Guwahati songjinmao pakma be·dape mande saksani saknaani koborkoba man·sodapaha.
Unbaksana, banggrichakatgipa biap Sonitpur district-ni songsul Darrang district-oni mitam a·arangni bakroe aro apale bretanirangkoba koborrangko man·soaha.
