Shillong, Oct 31: Meghalaya ni Skotong Minister Pa. Conrad K. Sangma, koelani bidingo opposition dilgipa Dr. Mukul M. Sangma ni ku·jokaniara kakket ong·ani komia aro manderangko jajaatasan ong·aia ine aganaha.
Mande ra·ako man·na kragipa Supreme Court aro National Green Tribunal ni dongimin niamrangko Meghalaya Sorkari ja·rikaha ine aganengon, Niamko pe·ode NGT aro samtangtangni namgnina kamko ka·enggiparang uko jaksi otgenchim ineba aganaha.
Sorkarini jobor jost dakaniosa mining departmentni Officer rang kam ka·enga ine matnanggipani bidingo aganengon, Skotong Minister ian politics ni kattasa ong·aia, Sorkari pilak kam rangko ka·engon dongimin niamko ja·rikenga aro uni ariko re·badeja ine aganaha.
Cho·mangimin koelarangko dam dakkianio ru·utenga ine agananirangna aganskaengon, Pa. Sangma opposition an·tangtangni kattaon ja·gitdotenga, skanggipao uamang lakh 32 metric ton koelarang dongja ine aganaha uni ja·mano lakh 32 metric ton koelarangko ta·rake dam dakkina nanga ineba agantaiaha, mai dakgipa kattarangko uamang aganengachim uko uamang an·tangtangan u·ina nanga maina kattani re·bikpilaniko sakantian nikenga ine aganaha.
Oppostion dolo dal·bea jajaani ong·enga, ge·etgimino pangchake pilak kamrangkon Sorkari sulsul ka·enga, badiaba district rangode dam dakkianirangko a·bachengate chegipana uko saljitna bilko on·nasiaha, Apex Court oni rakgipa niamko on·ani gimin uarang pilakko chu·sokatesa Sorkari kam rangko ka·gen ineba Pa. Conrad Sangma aganaha.
