Shillong, Jan 8: Meghalaya a•dokona gipin biaprangoni salsa rona re•baenggipa manderangko gital kuligipa Umling entry point-o napna on•jaengani gimin iandakgipa ja•kuko de•na skang Meghalaya sorkari, dingtang dingtang dolrang baksa agangrikchengahama ine Congress dolni MLA Ampareen Lyngdoh sing•doangaha.
Sorkarioni u•iataniko on•ani gitade, Umling-ni tourism screening centre-o kamrangko ka•anio neng•nikanirangko man•na nangengani gimin salsana re•baenggipa gipin biapni manderangkode a•doko napna on•jaengahachim.
Indake ong•engon, salsana re•baenggipa manderangko a•doko napna on•janiara tourism-ni dingtang dingtang kamrango neng•nikanirangko ra•baani gita ong•gen ine Congress-ni MLA parakatenba, iandakgipa ja•kuko de•na skang sorkari, dingtang dingtang dolrang baksa agangrikchengahama ine sing•doangaha.
Official-rangni u•iatani gitade, Ri Bhoi a•jani Umling entry/exit point (facilitation centre)-ko kulichengaoni salantian sak ritchani ritcha tourist-rang ia entry/exit point gita Meghalaya a•dokona re•napbaenga indiba ia check gate-ko kulichengaoni sak 150-mangkode nanggipa lekkarang dongjani gimin aro salsanasan a•dokona re•baengani gimin watpilatahachim.
Indake ong•engon, Meghalaya a•dokona re•baenggipa tourist-rang, an•tangtangan RT-PCR negative report-ko ra•e re•bana nanggenma ma Umling entry point-o Rapid Antigen Test (RAT)-ko dakon ong•aigenma ukoba talatchina gita Congress MLA, a•dok sorkario dabiangaha.
Tourist-rang Meghalaya a•dokona re•baon salbongna hotel-tangtango nape dongna nanggenma ma an•tangtangni skani gita a•doko roame rona man•gen ukoba talatchina gita Ampareen Lyngdoh dabiangaha.
Meghalaya a•dok da•o dipet COVID-oni jakgitel ong•kujaenga ine janapatengon, mikrake kam ka•aniko dontongkujachina gitaba ua a•dok sorkariko didiangaha.
