Shillong, Dec 17: Sawlyngdoh Higher Secondary School-ni bilsi 50 gapaniko maniani bak gita Sukrobar salo, Meghalaya a•dokni Chief Minister Conrad K Sangma, Education Minister Lahkmen Rymbui, Commerce & Industry Minister Sniawbhalang Dhar aro MLA Nujorki Sungoh nangrimenba, ia skulko kulidile on•gipa ‘Thomas Suchiang’-ni statue-ko oprake on•angaha.
Ia skulni bilsi 50 gapaniko manianio a•dokni Chief Minister, jinmana aganprakangengon, a•doko lekka porani gadangko tang•doatna gita sorkari, on•kange kam ka•enga ine gisik ra•atpilaniko on•angaha.
Lekka porani a•bakkuko namdapatanian ia sorkarini mongsonggipa daitorangoni mingsa ong•a ine talataniko on•angengon, dingtang dingtang neng•nikani aro ra•bianirangko chagrongna nangengoba ia sorkari, a•doko lekka porani gadangko ka•sine dingtangatna jotton ka•enga ine Chief Minister parakataha.
Chief Minister-ni aganani gitade, Meghalaya a•doko bang•a skulrangon chatro chatrirangna asongchakani aro namgipa skul nokrang dongjani a•sel neng•nikanirangko chagrongna nangenga indiba sorkari iandakgipa ra•bianirangko mikkangpae a•doko lekka porani gadangko namdapatna rake kam ka•enga.
Bilsiprako lekka porani kamrangna sorkari, gong kror 2000-mangko koros ka•enga ineba ia tom•anio Chief Minister parakataha.
Ia program-ko ong•atanio a•dokni Chief Minister, ia skulni souvenir-koba oprake on•angjolaha.
