39 C
Tura
spot_img

Selsela songni gittim damsao BSCPL Company rongimin arina bate rong·te bikote songni a·barangko nosto ka·a

Must read

Tura, Oct 20: West Garo Hills-o dolsa rikgipa company ni niam gri rong·terangko bilengani gimin songsa ni manderang namnikgijaniko parakataha.

Turani km 47 mang chel·ao gipa Selsela C&RD Block ni Kilman gittim-o songdongenggipa songni manderang, 2014 bilsio BSCPL Infrastructure Limited aro songni manderangni gisepo soi ka·grike ra·aniode dingtang dingtang niamrangko janapa gnangchim indiba uamang ua niamrangko pe·aha ine mijalo Hub News na u·iataha.

Jolatangni manderangni aganani gitade tangka Gong. lak 10 ko on·e ua company bilsi 5 ong·na am·pile rong·terangko ote ra·enga. Nokking 36 san dongaigipa Kilman Gittim-ni manderangna songoniko rong·te ote ra·anina tangka paisarangko dakchakskagen ine 2014 bilsio soi ka·grikanio janapa dongachim indiba maming dakchakanikon uamang on·jaha batesa 2017 bilsio songni nokmako ka·mikkenate bangbang lekkao soi ka·ate 2019 bilsion company ni contract bon·ahaoba da·o saoba ua biapo rong·te bikotaniko a·bachengtaipilna miksongenga ine songni manderang matnange aganaha.

U·iatani gitade ua jolni rong·teko Garobadha – Dalu ramako Asian Development Bank ni gita tarinasa breahachim, da·o ua ramako matchotmanpilahaoba tangka paisani gita maming dakchakanikode man·skajaha.

A·bachengode bang·gija truck gari rangosan rong·te rangko salchengaiachim indiba adita ja rangni ja·manode salo bol 100 na bate salaha, indakgipa obostarangko chugipa gadangona u·iatahachim indiba maming namgnian dongja ineba janapaha. Rakbee am·sandian ja·mano company aro nokma ni gisepo soi ka·grikgipa lekkako nikahachim indiba uno segrikanirang rongtaljani gimin songni manderangba bilgri ong·aijok. 2017 bilsio companyoni songko aro songni nokmako tol·e dosi gale rim·atachim indiba ja·mano watpilaha ineba aganaha.

Rong·te bikotna segrik jotgrike ra·aniode hectare 2 a·ana san soi ka·grikaiachim indiba company maming on·anirang gri una badepile bikotaha jeni a·selan songni nokni manderangni ge·a gama , bagan bari dake cha·anirang namen nosto ong·ataniko man·aha ine songoni saksa Pa. Tapjeng Marak aganaha. Soi ka·grikani ariko company re·badee manderangni a·barangko nosto ka·aha ine songni Nokma Pa. Gotjeng Marak aganskaaha.

spot_img

More articles

spot_img
-->

Latest article