Tura, Feb 4: South Garo Hills a•jao niam gri aro dongimin niamna bate koelarangko salenga ine A•chik Holistic Awakening Movement (AHAM) matnangatenba, iani bidingo Gasuapara CP aro Dalu police station-o FIR ka•doangaha.
AHAM-ni vice president Georgeprince Ch Momin-ni u•iatani gitade, dakkie galgimin koelarangko salchina National Green Tribunal (NGT)-ni ge•etaniko on•angani ja•man, South Garo Hills a•jaoba maming challan gri koelarangko salna a•bachengskaaha aro ia koelarangko salenggipa truck garirang dongimin niamna bate koelarangko salengani a•sel South Garo Hills a•jani rama jal•langrang nosto ong•atako man•skaengachim.
“Chingni kobor man•soani gitade, Gasuapara-ona koelarangko salbaenggipa truck garirango challan-rangba dongja aro koelarangko nangana bate salengani a•sel ia rama jal•langrang nosto ong•atako man•tokengaha,” ine Momin parakataha.
Niam gri koela salaniko nirok sandianirang dongjaengani a•sel Meghalaya a•dokna kajinarangko man•anio bang•en noksan ong•atako man•enga ineba AHAM parakataha.
“Dingtang dingtang dolrangni matnangani gitan Meghalaya a•doko niam gri koela bikotani aro koela salruraaniko champenganirang dongjaenga aro iani a•selan a•dokna noksan ong•enga,” ine AHAM-ni vice president parakatenba, iani bidingo uamang police-rangna badi ka•doangaha ine parakataha.
