Kohima, Feb 4: Salgro salaram a•dokrango hydro project-rangko a•bachengningna man•jaengani a•sel manderang kajinarangko bang•e gamna nangenga ine da•al Bristibar salo Nagaland a•dokni Chief Minister Neiphiu Rio parakatenba, hydro project-rangko ta•raken matchotatchina kam ka•enggipa dingtang dingtang dolrangko didiangaha.
“Bijolirangko bikotna gita hydro project-rangko nangchongmotani gimin ia project-rangko ta•rake matchotatna nanga,” ine Rio, chang 21-gipa North Eastern Regional Power Committee (NERPC)-ni tom•bimonganiko a•bachengatani somoio aganangaha.
Ia tom•bimonganiko a•bachengatani somoio salgro salaramni dingtang dingtang power minister-rangba dongpae bak ra•angaha.
“Power department-ara rakbatsranggipa kamrangko ka•gipa department-rangoni ge•sa ong•a aro bijoliko manderangna aro dingtang dingtang kamrangna chu•onga gita on•ade kam ka•gipa sakantinin on•gilaniko nanga,” ineba Nagaland-ni Chief Minister aganaha.
Nagaland a•dokni Chief Minister Neiphiu Rio, NERPC-niba chairman ong•enga aro ia tom•anio uni aganani gitade, salgro salaram a•dokrango bijoliko nambate on•na man•na gita NERPC rakbee kamrangko ka•enga.
World Bank-ni dakchakanichi Union Power Ministry-ni ning•o ra•gatgipa aro POWERGRID-ni jako ra•enggipa North East Region Power System Improvement Project (NERPSIP) gita dakgipa project-rangchi salgro salaram a•dokrang bang•a namgnirangko man•gen ineba Rio parakataha.
Ia tom•anio Meghalaya a•dokni Power Minister James K Sangma-ba dongpae jinmana aganprakengon, NERPSIP-ni ning•o donggipa mitam project-rangde Transmission Line-rangko songanio ja•manchakatako man•enga ine parakangenba, ia project-rangko ta•rake matchotatna man•na gita cholrangko sandichina NERPC-ko didiangaha.
Salgro salaram a•dokrangara a•briarigipa biaprang ong•e bang•a somoion hydro power project-rangko jako ra•e kam ka•anio somoirangko nangronga aro uandaken korosrangba batangronga ineba Sangma aganaha.
Salgro salaram a•dokrangni bijoliko Bangladesh a•songna palskana man•na gita bijolirangko bikotdapani cholrangko sandichina gitaba ua NERPC-ko didiangaha.
