Shillong, Feb 11: Adita salna skang, a·dokni Governor Pa Satya Pal Malik-ni ILP-ko ra·gatanichi tourism-ni a·bao a·dokna namroro-silroroaniko on·anio aro kajinako man·gnio namen su·pekaniko man·gen ine agananggipana, Confederation of Meghalaya Social Organizations (CoMSO)ni chairman, Robertjune Kharjahrin-ni aganchakani gitade, tourism-ni a·bao a·dokna namroro-silroroaniko ra·baa ba ra·bagijanio Inner Line Permit (ILP)ko iani ja·pang dake ra·nade man·ja ine aganskaaha.
“Governor-ni agangipa kattarang maming pangchakani gri ine agananio, ILP-chi a·dokona gipinchini re·baanio aro kajinako man·gnirango aro a·dokni tang·dognina nangchakeani donggen ingipara ong·chongmotja,” ine Kharjahrin, jean Hynniewtrep Youth Council (HYC)ni padotba ong·enga mijalo kobor ra·timgiparangna aganaha.
A·songgipinchini re·bagiparangna Sikkim a·dokode Prohibited Area Permit aro Restricted Area Permit iarang donga, indake ong·oba PAP aro RAP grigipa Meghalaya a·dokna baten bang·a gipinchini manderang a·dok-chigako nina-rona gita re·bagiparang uno namen bang·batskaienga ine toe aganenba, tourist-rangko gisik salna gita Sikkim a·dok an·tangtangan uamangni a·jatangko name nitoe tarina gisiko nangaha indiba an·chingni Meghalaya a·dokode a·jatangko nitoe aro nambate tariani dongja. Shillong-ni km 5 mangsan ong·aigipa ramako batsotna kontasa somoiko nangode an·chingni a·dokona sawamancha re·bana sikgen. Gari-gorani sket-changket dakanan manderang neng·niktokaha,” ine ua parakaha.
Sohra-na agre, a·dokni gipin nina-rona namnamgipa biaprangko niatode ramani obostan dongsrangja. Uni gimin Meghalaya-ko tarie namdapatna nangenga aro tourism-ni a·bako tang·doatna scheme aro policy-rangko ra·bana gita nangenga ine aganan baksa, ILP ra·gatgimin a·dokrang jekai Arunachal Pradesh aro Mizoram-an Eleventh Five year plan-ni somoio ILP donggijagipa Meghalaya-na batede GDP-oba namen nambataha aro iara maini a·sel? Haida uamango kragipa policy dongakon ba politicalni gitaba a·dokna namdapaniko ra·bana gisiko nangani dongakon ine CoMSO-ni chairman agandapaha.
“ILP-ara Visa gita ba una komigipa gitasan ong·a. Visa-ko dake ra·na nanga inaiana, gipin a·songchini maming tangka-paisa botanirang dongjawa inede ong·ja. India-ona gipinchini re·bagiparang Visa-ko dake ra·na nanga, indiba an·chingni a·songo da·omangba a·songgipinchi tangka-paisa botgiparang bang·en dongkuaia ine agananio, tangka botgiparangko miknapatna namgipa policy dongode uamang sokbaaigen indiba ILP indake ong·ja, maina jensomaio nangchongmotgipa lekkarangko mesokahaon aro a·dokona napbaani miksonganiko talatahaon iako darangan on·na gita jechakani dongjawa ineba ua agankuaha.
ILP-ko agangrikangna nangani gimin Governor-ni agan-ku·pattianina, saming golpogrikaniko governor iano miksonga anga iako uo sing·na sika, maina iako chinga cabinet, MLA-rang baksa chanchirimaha jekon ja·mano jinmaan namnike ra·chakangaha.
Da·o chingni chanchirimna nangnikanide, Home Ministry, union home minister, prime minister aro India-ni president baksasa. Amit Shah-ni re·baon chinga uko grongna jotton ka·aha, indiba ua somoiko choljokatjaha. Da·o, uko grongna Delhi-ona okamate somoikon choljokate on·chenggijara chinga saming chanchirimanggen.”
Ma·mongni seoke watata man·gipa ong·e, iani gimin chanchirimna gita jatni bewalo re·dilenggipa dilgiparang baksana chinga gimikna uko grongna gita somoiko choljokate on·pachina chinga Governor-o mol·molna nangnika. Chingna somoiko on·ode, Prime minister, President baksa chinga gimikan salgimik-walgimikba asonge chanchirimna kusi ong·a, indiba somoikon man·jaode chinga iako saming agangrikanggen,” ine Kharjahrin sing·doaha.
MRSSA-ni bidingo governor-ni aganpaanina, a·doko MRSSA-ko ra·gate on·angode ian napbagiparangko nirikkiatna aro a·dok gipinchini iano dongegiparangko nichokkiatna man·gnok, indiba ia niamchi CAA-oniko 100 percent-de chingna chelchakaniko on·jawa ine ua aganaha.
“Da·ode niamko ra·gatkujani gimin CAA-chi maidakgipa su·pekani ong·gen uko u·ikuja, indiba jensomoio niamko ra·gatahaon citizenship-na dorkasto on·giparang bang·akode nisoaibojok, uni gimin CAA-na skangan ILP-ko ra·gataniko chinga nangnikenga jedakode da·o Bangladesh, Pakistan aro Afghanistan-chini re·bae niam gri dake a·doko songdongenggiparang citizenship-ko man·jawa,” ineba ua agankuaha.
Unbaksana, niam gitaba ILP-an ra·chakna krabatgipaba ong·enga, maina ian constitution-ni gita ra·chakgimin ong·a ine Supreme Court-ba iako ra·chakaha, indiba MRSSA-nade judicialni gita porikka ka·e nianiko da·osa a·bachengenga ineba Kharjahrin agan-talataha.
ILP aro MRSSA ia minggnian ge·sa-ge·gipinko mangrakdapatani gita ong·enga ine talatengon, iachi mamingoba jajaani dongja ine aganenba, MRSSAB, 2020-na soiko on·china gita chinga governor-o mol·mola, maina ia niamara a·dokni ning·ao chianchie ra·bagiminsa ong·a, iana ua ministry-ni ra·chakaniko sengna nangani dongja aro iani gimin council of ministerrangni agan-ku·pattianirangko governor knachakna nanga,” ine organisation-ni dilgipa janapatjolaha.
