Guwahati, Feb 11: 2019 bilsio dingtang dingtang dolrangni Citizenship Amendment Act (CAA)-ko jegale so•sojengjeng ong•atani kamrangko ka•anio jak dongpaanina rim•ako man•gipa Akhil Gogoi-ni jaminna bi•aniko da•al Bristibar salo, Supreme Court-ba jegalataha.
Iana skang, re•anggipa bilsini August jaoba ua NIA court-o jaminna dorgastoko galahachim indiba ua chango uni bi•aniko NIA court-ni gita jegalatahani gimin ua Gauhati High Court-o jaminna dorgasto galskaahachim. Indake ong•genchimoba Gogoi-ni jaminna mol•molaniko re•anggipa January 7 tariko Gauhati High Court-ba jegalattaiahachim.
Gauhati High Court-ni jegalatani ja•man ua Supreme Court-ona re•angskae, jaminna dorgasto galtaiahachim ine nikna man•a.
Gauhati High Court-ni rai on•aniko ra•bie Supreme Court-o dorgasto galaniko da•al Bristibar salni bako Supreme Court-ni Justice NV Ramana, Justice Surya Kant aro Justice Aniruddha Bose-nbi bench nipilangenba, Gogoi-ni jaminna bi•aniko jegalattaiaha.
“Da•o dipet chinga uni mol•molaniko ra•chakna man•kujawa,” ine Supreme Court-ni bench parakataha.
Gogoi-ni biapo uni ukil Jaideep Gupta, Supreme Court-o mikkangpaengon, so•sojengjeng ong•atani kamrango Gogoi jak donga ine maming sakkirang dongja aro ua somoio dingtang dingtang dolrangni jegalaniara bobil dake chakatani kam ong•ja ine talatna jotton ka•ahachim.
2019 bilsio dingtang dingtang dolrangni CAA-ko jegale jingjengatanirangko dakanichi Assam a•doko obostarang namjabatrorona kenchakenba ja•mano Gogoi-ko 2019 bilsini December jao Jorhat-oniko rim•ahachim.
Uamangko rim•ani ja•mano, so•sojengjeng ong•atani kamrango uamang jak dongama dongja aro Maoist bobil dol baksa jak dongama dongja, uarangko am•sandina gita National Investigation Agency (NIA)-na pakwate on•angskaahachim.
Manderangko ding•chaoatna jotton ka•anina matnange Gogoi-ko UAPA-ni ning•o rim•ahachim.
