Shillong, Mar 25: Jaintia Hills a•jani ning•o donggipa Shangpung aro Nartiang Elaka-ni gital Dolloi-rangko seokna election-ko ong•atani result-rangko Sukrobar salo, Jaintia Hills Autonomous District Council (JHADC) parakataha.

Shangpung Elaka-o Chanki Langbang, 5506 vote-rangko man•e gital Dolloi-na seokako man•aha aro Nartiang Elaka-o Salong Lamare, 3180 vote-rangko man•e gital Dolloi-na seokako man•skaaha.

Dolloi-na seokako man•ani ja•man uamang sakgnian an•tangtangni Elakao donggipa manderangna nambate dangdike on•angna gita ku•rachakangaha.

Jaintia Hills-o ia Dolloirangara, changsa seokako man•ahaode janggi tanga gimiknan toromni gita, ainni gita aro songni nokni pilak kamrangkon nirokna gita bilko man•aiahachim.

Ia Elaka damgnini gital Dolloi-rangko seokna gita election-ko Budbar salo ong•atangahachim.