Shillong, March 25: South West Garo Hillsni saksa police Nurul Islam minggipa 2013 bilsio bilsi sokkugijagipa me•chik bi•sarangko til•ekdraani mamlako Special POCSO Court sukrobar salo parakataha. POCSO Courtni special Public prosecutor Evalarisha Rynjah dos dakgipa mandeko janggi tanga gimik pattoko donatchina ge•etaha. Indiomangba iani bidingo sombar salo dolgnini dosko nigrikani ja•mansa jekoba chanchigrikanggen ine Special POCSO courtni judge FS Sangma aganskaaha. Bristibar salo Nurul Islamni dos donga ine nike 2012 POCSO Act aro IPC act-o pangchake niam gita sastiko on•angna tik ka•aha. ” Laksa tangkako jorimana gamna nangan baksa janggi tanga gimikna ia mandeko sasti on•a nanga” ine Rynjah aganaha.
2013 bilsini March 13 tariko bilsi 14 san ong•kuaenggipa me•chik bi•sako Ampatio drae til•ekaha aro apsan bilsini March jani 31 tarikoba til•eka man•gipa me•chik bi•sani abitang jean bilsi 17 sankuengachim ukoba drae kal•akahachim ine gisik ra•atna man•a.
Nurul Islam ia obostako darangnaba agana on•jachina ka•mikkenataha aro manigija dakode so•ote galgen ineba kenataha ine duko ga•akenggipa pagipani FIR seao janapanikoba nikna man•a.
