Shillong, May 16: Minute-prako litre 270 oxygen-ko chipna tarienggipa oxygen plant-ko konta 24-ni gisepon East Khasi Hills a•jani Shillong Civil Hospital-o a•bachenggnok.
Ia oxygen plant-ko songani kamrang 98 percent-ni gitade matchotmanaha aro ia oxygen plant-ko konta 24-ni gisepon jakkalna a•bachenggnok.
Kobor on•ani gitade, ia oxygen plant-ko a•bachengatahaon ge 25 palangrangnade oxygen-rangko chu•onga gitan on•na man•gnok.
Shillong Civil Hospital-o ia oxygen plant songani kamrangko Robibar attamchibara a•dokni Chief Minister Conrad K Sangma nieaha aro ja•mano hospital-o kam ka•enggipa doctor, nurse aro gipin kam ka•giparang baksa tom•e agangrikangjolaha.
A•doko songdongenggipa manderangni namgnina an•tangtangko on•kange kamrangko ka•engani gimin ua hospital-ni doctor-rangko, nurse-rangko aro gipin kam ka•giparangko ia tom•anio mittelpilangaha.
Meghalaya a•doko COVID-19 ta•raken batrikrikengani gimin sabisini giproroaniko champengna district administration-ni ja•ku de•anirango chu•sokgipa ong•atna sorkari kamko ka•enga ineba Chief Minister parakataha.
Da•o dipet Meghalaya a•doko COVID man•e dongenggiparang sak 4534 gapengahani gimin sorkari, East Khasi Hills a•jao lockdown-ko ra•gate gipin a•jarangoba rakgipa niamrangko ra•gatangaha.
Meghalaya a•dokni pilak a•jarangon COVID-ni giproroaniko champengna kamrangko ka•tokenga ineba Chief Minister parakataha.
