Shillong, May 11: Sajinmani giproroaniko man·adipet champengna sorkari miksonge ja·kuko de·atenba East Khasi Hills a·jao chu·gimik chipchangataniko ba lockdown-ko ra·dodapangani gisepon, salantina kamai ka·e cha·enggiparangnade ian minggipin dakgipa neng·nikanirang ong·taiskaenga.

Lockdown-ko ra·dodapatanichi maidake cholienga iako adita sak dokan dakgiparango Hub News-ni sing·roke nianiko dakangon, uamang gimikan an·tangtangni chagrongenggipa neng·nikanirang aro jajrenganirangko parakangtokaha.

Polo bajaro dokan dakgipa saksa Rajkumar Sharma, somoi gita bosturangko sokatjaengani gimin suk ong·gija aganan baksa lockdown-ni somoiosa indake ru·utataniko chagrongenga ineba ua aganaha.

Unbaksana, sabisiko mikkangchake kamko ka·enggiparang gita chacha uamangko sorkarini chanjaengani giminba Sharma sing·doangaha. “Nangchongmotgipa bosturangko salantin chinga hajalni hajal manderangko chagronge bosturangko palatenga, uni gimin chingkoba mikkangchakao kam ka·giparang gita apsan channa nangachim. Chingni an·seng-baljokaninaba namen kenchakna nangani gnang,” ine Sharma agankuaha.

Indake sakgipin Pana Das, dokano donggipa bosturangni damrangko sulsul tarie donna nanganio chagrongenggipa neng·nikanirangko janape aganskaaha. District Administration, dokanoni bosturangni damrangko sulsul see on·engnaba gnang indiba ian uamangnade neng·nikani ong·taiskaa ine Raj aganaha. “District Administration, dokanrangona re·bae bostuni damrangko nirokaniko dakenga indiba, chingni bostu brebaenggipa Paltan Bazar-china re·ange niosa uamang damrangko nambate ma·sigenchim,” ine Das parakataha.

Indake janapatjolna man·gen, je salantio kamai ka·e cha·enggiparangnade da·odipet sorkarioni maming dakchakanirangko on·na dongkujaengachim. Iani gisepon, East Khasi Hills district-o re·baenggipa May 17 tarikona kingkingan sorkari chu·gimik chipchanganiko ra·dodapataha.