Shillong, April 19: A·dokni skotong minster Pa Conrad K Sangma, Shillong-o donggipa Jawaharlal Nehru Stadium-ko namdapatna aro apalbatatna gita kamrang ka·atenggipako Butbar salo nirokangaha.
Kal·chakram biap ba stadium-ko taridapanio, football kal·chakramo a·aoni chatelaigipa samsirangko on·e namdapatani aro pilak katsusaani ba kal·chakani biaprango chasongni kri nangchongmotgiparangko on·e namdapanirangko man·gopa.
A·dokni skotongo donggipa stadium-ko nambate rikatenggipani bidingo a·dokni skotong minister Pa Conrad K Sangma-ni agananganio, ia kal·chakramko rikna gita dingtang dingtang dongimin ge·etanirangko ja·rikataha aro iako rikatani kamrang jensomoio matchotahaon, a·gilsak gimikni dingtang dingtang dakgipa susaatanirangkoba ia kal·chakramo soka-chakna gita man·gnok ine u·iatangaha.
Taridapenggipa ba apalbatatenggipa kal·chakramko ia bilsini December jaon matchotatgen aro ia kal·chakramo sak 30,000 mang nigiparangko nokchakna gita chu·ongen man·gnok ineba Pa Sangma u·iatangaha.
Ia football stadium-ni sambao, dingtang dingtang dakgipa kal·anirangkoba soka-chakna gita multipurpose indoor stadium-ko rikatatjolenggipani bidingo skotong minster-ni aganangskaani gita, ian salgro-salaram jolode dal·batsranggipa multipurpose indoor stadium ong·gen ine u·iatenba, indoor stadium-o, minggipin kal·susaani jekai basketball, squash, badminton, table tennis, volleyball ba ugita dakgipa kal·susaatanirangkoba soka-chakna gita man·gnok ineba parakataha.
Kal·chakramko taridapatani pilak kamrangna Pa Sangma an·tangni kusi ong·aniko parakangengon, jensomoio ia kal·chakram biapo chasongni kri pilak nanganirang chu·ongen donga baksa rikatani kamrang matchotahaon, a·dokni chadamberang uamangni susaani a·barango mikkangchi nambate chu·sokangna gita cholkoba man·gnok ineba ua parakataha.
Salni bako re·ange nirokanganio, skotong minister, Polo-o donggipa ge·gipin kal·chakram biapkoba nirokangjolenba, a·dokoni chadamberang robol ga·tingna namen gisiko nangbataniko nikna gita man·engani gimino, robol kal·giparangni namgnina, a·dok gimiko donggipa joltangtangni kal·chakram biaprangko namdapatani gimin ba apalbatatani giminba a·dok sorkari kamrangko ka·atenga ineba skotong minister parakataha.
Ia JN stadium-o Integrated Hospitality aro Sports Complex-ko rikna gita chu·gimik koros ong·gipara gong kror 125 mang ong·enga, indake JN Sports Complex-ko skanggipa gadango namdapatani korosara gong kror 34.75 ong·a, gnigipa gadango namdapatani korosara gong 18.2 aro SSA ground-ko apalatani chu·gimik korosara gong kror 14.81 ong·skaenga.
