Shillong, Aug 10: Mongolbar salpaksachibara, Shillong songjinmani Laitumkhrah jolo boma gopretaha aro ia gopretanio me•chik saksako man•chape sakgni manderang saknaanirangko man•aha.
Koborko on•ani gitade, ia boma Mongolbar salni 1:30 bajimango gopretaha aro boma gopretanichi gopretchakgipa biapo a•kol dakako nikna man•aha aro samba jolo donggipa nokrangoba aditan nangchakeaniko man•aha.
Ia boma gopretaniko saksa Cynthia minggipa me•chik, mikrontangchi nikaha aro uni aganani gitade ia gopretgipara cylinder gas-ba ong•jachim.
“Chinga knal dipet chingni cha dokkanko kulipiltaina siengani gimin anga angni nogipa baksa chingni cha dokkanko rongtalatna re•baahachim. Chingni dokkanko rongtalatengmiting somoio rang•san boma gopretaha aro chingni dokkano wal•kumitipahani gimin anga angni nogipako okamaha. Rang•san gopretani a•sel angni nogipa dokkanoni ong•katningna man•jaha aro angasa uko de•ongkatna nangaha,” ine Cynthia, ua somoio ong•a obostani gimin aganaha.
Uni nogipa adita mata bu•anirangko man•ahani gimin uko sanna gita Nazareth Hospital-ona ra•angaha indiba da•o uni obosta namkalaha ineba ua parakataha.
Boma gopretani ja•man bakan jolni MLA Ampareen Lyngdoh, boma gopretgipa biapona re•ange sing•sandianirangko dakeaha.
Boma gopretchakgipa biapo sipai dolrangko donataha aro da•o ia gopretgipani bidingo ma•sina gita official-rang am•sandienga ine a•sel ong•ani ja•man Lyngdoh parakataha.
Batanggimin somoirango ia jolrango iandakgipa a•selrang ong•a dongkujachim ine jolni dilgipa (Rangbah Shnong) Andrew Jyrwa-ba parakataha.
A•songni jakgitelaniko manina skang iandakgipa a•sel ong•ahani gimin ua ia jolrango chel•chakgipa sipai dolrangko donatchina district administration-o bi•atgen ineba Jyrwa parakataha.
Da•o dipet ia boma gopretgipani bidingo police-rang mamingkoba agankujaengon, ia boma gopretanio jak donga ine a•doko bobil dake chakatenggipa Hynniewtrep National Liberation Council (HNLC) a•kangattaiskaaha.
“Laitumkhrah-o boma gopretanio jak donga ine HNLC dol a•kangenga,” ine HNLC-ni general secretary Sainkupar Nongtraw, social media-o parakataha.
Ia boma gopretchakgipa biapko da•o chipe donataha aro Fire Department-ni Crime Scene Unit (CSU), ua biapo am•sandianirangko dakengaha.
