Shillong, Aug 20: Pilak niam aro ge·etani obostarang Shillong songjinmao da·o namen tom·tombapilaniko nikna man·engaha ine a·dokni skotong minister Pa Conrad K. Sangma, antio changprak Sukrobar salo kobor setimgiparangna agananio parakataha.
A·dokni skotong songjinma Shillong-ko ong·rongbewalona sokatbapilani aro tom·tomaniko ra·baanina iani gimin gisiko nanggipa dingtang dingtang dolrang baksaba sorkari kamko ka·enga ine skotong minister u·iataha.
MDA-ni da·o sorkariko rikani dingtang dingtang bewalrangko jaksi ota gnang warachakgipa dolni dilgipa Dr. Mukul Sangma-ni matnanganina aganchakengon, Congress dolni kaman sorkariko maidakode ga·akatna man·gen iani giminsa mikpakna nie dongaienga ine skotong minister aganangaha.
Congress dolni dilgipa Dr Mukul, mamingko chanchigija bingbang kattarangko aganaia ine janapatengon, uni iandakgipa kattarangna Congress doloni mitam MLA-rang krat-cha·chakeming uko kema bi·china gita aganpilenga. Congress-o dilgipani maming gunan dongja aro Dr. Mukul Sangma-ni pilak bewalrangchin dolna krat-cha·anikosa ra·baienga ine skotong minister parakatkuaha.
MDA-o bakrimenggiparang Congress baksa bakrimna jechaktokengoba, da·o rikenggipa sorkariko be·gruatnasa Dr. Mukul changni-chang jotton ka·enga ine aganangan baksa, Politics-ni bilrangko mesoke kal·na jotton ka·mangmangaigija, a·dokni gimin chanchianirang aro namroro-silroroani gimin ua mongsong gisik on·bate warakachakgipa dolko name rikdilgipasa ong·na nanga ineba Pa Sangma agandapataha.
