Shillong, Aug 17: Shillong songjinmao obostarang ka•sine nambapilengahani gimin Mongolbar salo a•dok sorkari tom•e chanchirimangenba, curfew-ko Budbar pring 6:00 bajioni attam 4:00 bajiona dontongatchengna tik ka•angaha.
Iani bidingo kobor ra•timgiparangna talataniko on•angengon, curfew-ko neng•takatani bidingo East Khasi Hills a•jani Deputy Commissioner, manderangna talbate u•iatanirangko on•anggen ine a•dokni Chief Minister Conrad K Sangma parakataha.
Obostarangko nipiltaina gita Mongolbar attamchibara ua tom•aniko ong•atenba, manderangni namgnina curfew-ko neng•takatna tik ka•angaha ineba Chief Minister parakataha.
Mobile internet-ko Budbar attamni 6:00 bajiona chipe donangkugen ineba ua parakataha.
Shillong-o da•o obostarang namkalangaha ine janapatengon, Deputy Chief Minister-chi dilenggipa peace committee, knal tom•enba nanga gita ja•kurangko de•anggen ine Chief Minister parakataha.
