Shillong, Nov 1: Skangni ma·gitcham-pagitchamrangni ring·ani aro doka-damani bewalrang baksa man·chape doka-damaniko dakenggipa Shillong-oni dolsa ‘Summersalt’ minggipa band, uamangni ring·mesokanirangchi India-ni salgro-salaram aro Meghalaya a·doko jatni pilak dakmesokanirangko a·gilsakna ma·siate on·na gita Europe-ni damgittam a·songrang jekai Germany, Denmark aro Switzerland a·songrango ring·e mesokangnasienga.
Jatni doka-damani aro ring·ani dakbewalko ja·rike dakmesokgipa dol ia November jani 4 tariko Germany a·songchina sokangani ja·man India Week Hamburg 2021-o India-oni mongsongbatgipa dakmesokgipa ong·e uamang bakko ra·anggen.
Ia ring·gipa dolko, brinbawe dakgipa gitrangko tarie ring·ani giminba namen mingsinga. Khasi, English aro gipin jatni ku·sikrangchi tarie ring·gipa gitrango uamang jattangni daka-rikani bewalrangko man·chapatronga.
Ia band-ara bollywood-o bakrime kamko ka·enggipa industry-ni niksenggipa git ring·gipararang jekai Javed Akhtar, Usha Uthup, Farhan Akhtar, Shankar Mahadevan, Loy Mendonsa Ehsaan Noorani-maang baksa batanggimin 2016 bilsio musical drama Rock On 2-ko oprake on·anggipana gitrangko tarianioba bak man·pagipa ong·a.
Iamangni a·song damgittamchina wenange dakmesokanganio, gimik dam 7 biaprango uamang, Europe a·songo songdongenggipa mande jinmani mikkango ring·mesokange an·saoatangnasienga.
Ia tour-ko, Copenhagen-oni Zamans East India Travel Odyssey (ZEITO), Humburg-ni Indian Consul General Office, aro Consul General Mr. John Ruolngul-maangni dakchakanichi chu·gimik jako ra·e ong·atenga.
Indake ong·engon, re·baenggipa November 8-oni 14 tarikona India Week Hamburg 2021-ko ong·atani bak gita, India-ni Consulate General, November 11 tarik, Bristibar salo India-ni salgro-salaram a·jako tang·doatna gita Special Promotion of North East India program-ko ong·atna gita man·chisoaha, jeon Summersalt band, Khasi, Hindi, Assamese aro German ku·sikrangchi mande jinmani mikkango ring·e mesokanggen.
Ia tour-na India sorkarini Indian Council for Cultural Relations-ni dakchakataniko man·e Meghalaya sorkarini jako ra·enggipa Meghalaya Age Limited aro Meghalaya sorkarini Department of Arts and Culture, tangka-paisarangchi dakchakaniko on·aha.
