Shillong, Nov 1: India a•songni jakgitelko man•aoni bilsi 75 gapaniko manina gita ma•mong sorkarini ong•atenggipa ‘Azadi Ka Amrit Mahotsav’-ni bak gita Sombar salo, Meghalaya State Legal Services Authority (MSLSA)-ni gita Pan-India Awareness aro Outreach Program-ko Shillong songjinmani Main Secretariat-o donggipa Yojana Bhavan-o ong•atangaha.
Ia program-ko ong•atanio Supreme Court-ni Judge, Justice Dinesh Maheshwari, mongsonggipa sokgipa ong•e bakko ra•angaha aro unbaksana Meghalaya High Court-ni Chief Justice aro MSLSA-ni Patron-in-Chief Justice RV More, Meghalaya a•dokni Law Minister James K Sangma, Meghalaya High Court-ni Judge, Justice HS Thangkhiew aro Meghalaya High Court-ni Judge, Justice W Diengdoh-ba dongpae bakko ra•angaha.
Ia program-ko ong•atanio Supreme Court-ni Judge, Justice Dinesh Maheshwari, jinmana aganprakangengon, ia Pan-India Awareness & Outreach Program-ko Azadi Ka Amrit Mahotsav-ni bak gita National Legal Services Authority (NLSA) a•bachengataha aro ian a•songni jakgitelko man•aoni bilsi 75 gapaniko maninasan ong•aigija a•songo songdongenggipa pilak manderangnan kakket bichalko on•na man•na gita miksonge ra•gatgipa program ong•a ine parakangaha.
Ia program-ko ong•atanio Meghalaya High Court-ni Chief Justice, Justice RV More-ba jinmana aganprakangengon, kakket bichalko man•aniara Indian Constitution-ni ning•o mandena on•gimin bilan ong•a ine parakangaha.
Ia tom•anio a•dokni Law Minister James K Sangma-ba jinmana aganprakangengon, COVID-19-ni a•sel songsalo dingtang dingtang neng•nikanirangko chagrongna nangtokengon, manderang an•tangtangni bilna chadenganioba neng•nikanirangko man•na nangenga ine kakket bichal aro biltangna ka•oksienggipa manderangnaba apsan daken dakchakanirangko on•china didiangaha.
Ia program-ko ong•atanio MSLSA-ni Facebook Page aro YouTube Channel-koba Justice Dinesh Maheshwari-ni jakchi kulie on•angjolaha.
