Shillong, Nov 1: Darangba niamni kosako re•badena bil dongja aro Harijan Panchayat Committee-ni dilgiparang nangnikenga ong•ode sorkari baksa agangrikna man•gen ine Sombar salo, Meghalaya a•dokni Chief Minister Conrad K Sangma parakataha.

Harijan Panchayat Committee, sorkarini kosako jingjengatna ka•mikkenatahani gimin Chief Minister, ia kattarangko parakataha.

Sorkariko tunapgija ong•atgen ine Harijan Panchayat Committee-ni ka•mikkenatgipa kattarangna aganchakaniko on•angengon, a•doko songdongenggipa pilakan niam gitasa re•na nanga aro darangba niamni kosako re•badena bil dongja ine Chief Minister parakataha.Ia neng•nikaniko namatna gita sorkari, pangkamgipa cholko sandina jotton ka•enga ine janapatengon, a•dokni itihaso skanggipa changna ia sorkari, ia neng•nikaniko namatna gita pangkamgipa cholko sandienga aro ia cholko sandiania altugipa kam ong•jagenchimoba sorkari, a•dokni pilak manderang baksa agangrike cholko sandigen ine Sangma parakataha.

Da•o dipet Shillong Municipal Board-o kam ka•enggipa nokdangrangoni nokdang 40-mangde ia biaponi apjitangmanahachim aro gipin nokdangrangoba ia biaponiko apjitatna gita bakan kamko a•bachengatna siengahachim.