Shillong, Jylliew 23: U Symbud Myntri Rangbah ba khmih iaka tnat Transport Bah Sniawbhalang Dhar u la ong ba ka Sorkar Jylla kan sdang ban ai laisen noh ia ki nongkamai kali arshaka ba pyniaid daki kompani (aggregator) bad ki nong kamai shimet hapoh ki ar taiew ban wan, hadien ka jingialang kaba la buh ban long ha ka taiew ban wan.
U Bah Sniawbhalang u la ong ba yn ai laisen lyngba ka bor jong ka Sorkar Jylla sha baroh ki nongaplai kiba dei hok ban ioh lada ki biang lut ki ki kot ki sla ba donkam katkum ka ain.
“Ngan don ka jingialang ha ka taiew ban wan, kumta hadien shiphew sngi ne ar taiew, ngin sa ai laisen ia kino kino kiba apply, kata kynthup iaki riew shimet ne ki Company (Aggregator), lada ki biang lut ki kot ki sla katkum ka ain bad ka laisen kan dei katkum ka bor jong ka Sorkar Jylla” ula ong.
U Bah Sniawbhalang ula ong ba la bthah ia ki heh jong ka tnat Transport bad ki bor pyniaid kali ban pynjur ia ka jingpynjari bad ban leh pyrshah ia ki arshaka kiba kamai khlem don laisen.
“Nga la bthah ïa ki ophisar jong nga ban pynkhlain ïa ka jingdon haki surok bad ban shimkhia ïa kito kiba treikam beaiñ” ula pynpaw.
U Symbud Myntri Rangbah ula bynrap ba ka tnad ka dang lum jingtip halor ka jingdon kiba Apply license bad kumjuh ruh ka jingdon kiba kamai da arshaka. Ia ki jingkhein ba thikna halor ki laisen ba la ai yn sa tip kham bniah ynda la pyntreikam pura ia ka rukom treikam”.
“Ki jingtip ngi dang lum haduh mynta. Ngi dang dei ban pyntreikam pura, shisien ba la pyntreikam pura, nangta ngan sa lah ban iathuh katno ngut ki la ioh laisen” ula ong.
