Shillong, Feb 7: Shillong songjinmao apchangket ong•aniko komiatna aro songjinmako nitoatna gita sorkari, dingtang dingtang ja•kurangko de•chakataha ine Budbar salo, a•dokni Chief Minister Conrad K Sangma, Shillong songjinmani Polo-o Wah Umkhrah Riverfront Development Project-na pangchakaniko songe on•angani somoio jinmana parakataha.
Ia Wah Umkhrah Riverfront Development Project-ara, Wah Umkhrah-ko manderangni rochakgipa aro songsalni kamrangna jakkaltogipa ong•atna gita gong crore 39 koroschi taridapna sienggipa project ong•a aro ian Wah Umkhrah-ko tangatpilasan ong•aigija dingtang dingtang gital kolrangchi taridapna sienggipa project-ba ong•enga.
Chiring chibisikrangko nitoatmangmanganiara ong•gramanisan ong•aigen ine janapatengon, ia Wah Umkhrah-ni wilwilao donggipa biaprangko taridapna aro chiringko ripinge rakkina gita ia project-ko ra•gataha aro Wah Umkhrah baksana Umshyrpi chiringkoba rongtalatna gita a•dok sorkari, India sorkarini ning•o donggipa Jak Shakti Ministry baksa nangrime kamko ka•enga ine Chief Minister parakataha.
Wah Umkhrah aro Umshyrpi chiringrangko rongtalatna gita nangchongmotengaha ine janapatengon, iana proposal-ko gital dake taritaipilchina ma•mong sorkari aganahani gimin da•o iana proposal-ko a•dok sorkari nipiltaiengaha ine Chief Minister parakataha.
Shillong songjinmani apchangket ong•aniko komiatna nangengani gimin janapatengon, garirangko donchakna aro ramarango ma•manti bosturangko palbadinge cha•enggipa manderangna sorkari, dingtang dingtang biaprangko tik ka•manaha ine Chief Minister parakataha.
Police Bazar aro Bara Bazar-o skatang garirangni re•ruraani a•sel apchangket ong•engani gimin janapatengon, garirangni skatang napaniko champengna choking point-rangko aro bus garirang baksa taxi-rangnaba donchakni biaprangko tarina sorkari tik ka•aha ine Chief Minister parakataha.
Ia tom•anio, Shillong songjinmani dingtang dingtang gittimrangna My City Campaign-ni ning•o, gong 75,000 aro gong 1,50,000-ni cheque-rangkoba a•dokni Chief Minister Conrad K Sangma aro Deputy Chief Minister Sniawbhalang Dhar-ni jakchi suale on•angjolaha.
